ബാഡ്മിന്‍റണ്‍ പാരന്പര്യമുള്ള ദീപിക പദുക്കോണ് ഉപേക്ഷിച്ച വേഷം ഉജ്വലമാക്കാനുള്ള ഒരുക്കത്തിലാണ് ശ്രദ്ധ കപൂർ. ഹാഫ് ഗേൾഫ്രണ്ട് കഴിഞ്ഞാൽ ഇന്ത്യയുടെ ബാഡ്മിന്‍റണ്‍ സെൻസേഷൻ സൈന നേവാളിന്‍റെ ജീവിതകഥ പറയുന്ന ചിത്രത്തിൽ സൈനയുടെ വേഷമാണ് ശ്രദ്ധയ്ക്ക്. ഹാഫ് ഗേൾഫ്രണ്ടിൽ ബാസ്്കറ്റ്ബോൾ കളിച്ചിട്ടുണ്ടെങ്കിലും അതുപോലെ അനായാസമല്ല സൈനയുടെ വേഷമെന്ന് ശ്രദ്ധ പറയുന്നു.സൈനയെപ്പോലൊരു പ്രഫഷണൽ താരമായി മാറാൻ എനിക്ക് ഏതാനും മാസങ്ങൾ മാത്രമാണുള്ളത്. എന്തായാലും ഇത് ഞാൻ ചെയ്യുന്ന ഏറ്റവും കടുപ്പമുള്ള വേഷമായിരിക്കും.
എങ്കിലും ആ വെല്ലുവിളി ഏറ്റെടുക്കാൻ ഞാൻ ഒരുക്കമാണ്. ഹാഫ് ഗേൾഫ്രണ്ട് പൂർത്തിയായിക്കഴിഞ്ഞാൽ ഉടനെ സൈനയുടെ ചിത്രത്തിനുവേണ്ടിയുള്ള ബാഡ്മിന്‍റണ്‍ പരിശീലനം ആരംഭിക്കും. കുറേ നാൾ സൈനയ്ക്കൊന്നിച്ച് കഴിയണമെന്ന ആഗ്രഹമുണ്ട്. ഞങ്ങൾ ഇപ്പോൾ തന്നെ ഇതു സംബന്ധിച്ച് ആശയവിനിമയം ആരംഭിച്ചുകഴിഞ്ഞു-ശ്രദ്ധ പറഞ്ഞു.അമോൽ ഗുപ്തയാണ് മുൻ ലോക ഒന്നാം നന്പർ താരവും ഒളിന്പിക് വെങ്കല മെഡൽ ജേതാവുമായ സൈനയുടെ ജീവിതം വെള്ളിത്തിരയിൽ പകർത്തുന്നത്.
സൈന എന്നു തന്നെയാണ് ചിത്രത്തിന്‍റെ പേര്.അധോലോക നായകൻ ദാവൂദ് ഇബ്രാഹിമിന്‍റെ സഹോദരി ഹസീന പാർക്കറിന്‍റെ കഥ പറയുന്ന ഹസീന എന്ന ചിത്രത്തിലും ശ്രദ്ധ കപൂർ അഭിനയിക്കുന്നുണ്ട്.ബാഡ്മിന്‍റണ്‍ താരം പി.വി.സിന്ധുവിന്‍റെ ജീവിതവും സിനിമയാവുന്നുണ്ട്. സോണി സൂദാണ് ഈ ചിത്രം ഒരുക്കുന്നത്. ദീപിക പദുക്കോണാണ് സിന്ധുവായി വെള്ളിത്തിരയിലെത്തുന്നത്.
