ബംഗളുരു: ഐപിഎൽ റിക്കാർഡ് ബുക്കിൽ ഇടംപിടിച്ച് കോൽക്കത്ത നൈറ്റ് റൈഡേഴ്സ് ബാറ്റ്സ്മാൻ സുനിൽ നരെയ്ൻ. വേഗമേറിയ അർധ സെഞ്ചുറിയെന്ന റിക്കാർഡാണ്് നരെയ്ൻ സ്വന്തമാക്കിയത്. ബാംഗ്ലൂർ റോയൽ ചലഞ്ചേഴ്സിനെതിരായ മത്സരത്തിൽ 15 പന്തിൽ അർധസെഞ്ചുറി കുറിച്ചായിരുന്നു നരെയ്ന്‍റെ നേട്ടം. 15 പന്തിൽ അർധസെഞ്ചുറി കുറച്ച യൂസഫ് പഠാന്‍റെ റിക്കാർഡിനൊപ്പമെത്താനും നരെയ്നായി.
നൈറ്റ് റൈഡേഴ്സിനായി ബാറ്റിംഗ് ഓപ്പണിംഗ് ചെയ്ത നരെയ്ൻ 17 പന്തിൽ നാല് സിക്സും ആറ് ഫോറും ഉൾപ്പെടെ 54 റണ്‍സ് അടിച്ചുകൂട്ടി. വിൻഡീസ് ടീമിൽ സഹകളിക്കാരനായ സാമുവൽ ബദ്രിയുടെ രണ്ടാം ഓവറിൽ മൂന്ന് സിക്സും ഒരു ഫോറും ഉൾപ്പെടെ 25 റണ്‍സ് അടിച്ചുകൂട്ടിയാണ് നരെയ്ൻ അർധ സെഞ്ചുറിയിലേക്ക് അതിവേഗം കുതിച്ചെത്തിയത്.
നരെയ്നൊപ്പം ഓപ്പണിംഗിനിറങ്ങിയ ക്രിസ് ലിനും തകർത്തടിച്ചതോടെ ഐപിഎൽ പവർപ്ലേയിലെ ഏറ്റവും ഉയർന്ന സ്കോർ എന്ന നേട്ടവും നൈറ്റ് റൈഡേഴ്സിനു സ്വന്തമായി. ആറ് ഓവറിൽ 105 റണ്‍സാണ് ഇരുവരും അടിച്ചുകൂട്ടിയത്.
