കൊച്ചി: നഗരയാത്രക്കാരെ ഏറ്റവുമധികം വിഷമിപ്പിക്കുന്നതു വൃത്തിയും സൗകര്യങ്ങളുമുള്ള ശൗചാലയങ്ങളുടെ അഭാവമാണ്. സ്ത്രീയാത്രക്കാരെയാണ് ഇതേറ്റവും ബുദ്ധിമുട്ടിപ്പിക്കുന്നത്. പലപ്പോഴും ഒരു സ്റ്റോപ്പിൽനിന്നു മറ്റൊന്നിലേക്കു ശൗചാലയങ്ങൾ തേടി സ്ത്രീകൾക്കു അലയേണ്ടിവരാറുണ്ട്. ഇവർക്കു വലിയ ആശ്വാസമാണ് മെട്രോ സ്റ്റേഷനുകളിലെ ടോയ് ലറ്റുകൾ.
മെട്രോ സ്റ്റേഷനുകളിലെ പൊതുപ്രവേശനം അനുവദിച്ചിരിക്കുന്ന ഭാഗത്ത് സ്ഥാപിച്ചിരിക്കുന്ന ശൗചാലയങ്ങൾ മെട്രോ യാത്രക്കാർക്കു മാത്രമല്ല വഴിയാത്രക്കാർക്കും അനുഗ്രഹമാകുന്നു. ഇവിടെ പ്രവേശിക്കുന്നതിന് സാധാരണക്കാർ പണം നൽകേണ്ടതില്ല. മെട്രോയുടെ യാത്രാ ടിക്കറ്റും വേണ്ട. അതുകൊണ്ടുതന്നെ അത്യാവശ്യഘട്ടങ്ങളിൽ പൊതുജനങ്ങൾക്കും മെട്രോയുടെ ഈ സൗകര്യം ഉപയോഗപ്പെടുത്താം. മറ്റു പല മെട്രോകളിലും ടിക്കറ്റ് എടുത്തു പ്രവേശനം സാധ്യമായ മേഖലകളിൽ മാത്രമാണ് ടോയ് ലറ്റുകൾ സ്ഥാപിച്ചിരിക്കുന്നത്.
