തൃശൂർ: യുവമോർച്ച നേതാവിന്‍റെ വസതിയിൽ നിന്നും കള്ളനോട്ടടി യന്ത്രവും കള്ളനോട്ടുകളും പിടിച്ചെടുത്ത സംഭവത്തിൽ പോലീസ് അന്വേഷണം വ്യാപിപ്പിച്ചു. കേസിൽ കൊടുങ്ങല്ലൂർ സിഐയുടെ നേതൃത്വത്തിലാണ് അന്വേഷണം നടക്കുന്നത്. വ്യാജൻ ഒഴുകിയത് എവിടേയ്ക്കെല്ലാമാണെന്നും എത്രമാത്രം നോട്ടുകൾ പ്രതികൾ വിപണിയിൽ ഇറക്കിയിട്ടുണ്ടെന്നും പോലീസ് വിശദമായി പരിശോധിക്കുന്നുണ്ട്. ആർഭാട ജീവിതം നയിച്ചിരുന്ന ഇയാൾ പണം വാരിക്കോരി ചിലവഴിച്ചിരുന്നുവെന്നും പലിശയ്ക്ക് നൽകിയിരുന്നുവെന്നും ബോധ്യമായിട്ടുണ്ട്. പലിശയ്ക്ക് നൽകിയിരുന്ന പണമെല്ലാം വ്യാജ നോട്ടടി യന്ത്രത്തിലൂടെ നിർമിച്ചതാണെന്ന സംശയത്തിലാണ് പോലീസ്. വ്യാഴാഴ്ചയാണ് കൊടുങ്ങല്ലൂർ ശ്രീനാരായണപുരം അഞ്ചാംപരത്തി ഏരാശേരി രാഗേഷിനെ പോലീസ് അറസ്റ്റ് ചെയ്യുന്നത്.
സ്വന്തം ഉപയോഗത്തിന് വേണ്ടി മാത്രമാണോ ഇയാൾ നോട്ട് ഉപയോഗിച്ചിരുന്നതെന്നും അല്ലെങ്കിൽ വ്യാജൻ എവിടേയ്ക്കെല്ലാം ഒഴുകിയിട്ടുണ്ടെന്നുമാണ് പോലീസ് പരിശോധിച്ചു വരുന്നത്. രണ്ടാഴ്ച മുന്പാണ് നോട്ടു പ്രിന്‍റു ചെയ്യുന്ന യന്ത്രവും മറ്റും വാങ്ങിയതെന്ന് രാഗേഷ് നൽകിയ മൊഴി പോലീസ് പൂർണമായും വിശ്വസിച്ചിട്ടില്ല. സംസ്ഥാന നേതാക്കളുമായി അടുത്തബന്ധം പുലർത്തുന്ന വ്യക്തിയാണ് അറസ്റ്റിലായ രാഗേഷ്. ഇത് ഉപയോഗപ്പെടുത്തി ഏതെങ്കിലും തരത്തിലുള്ള ഇടപാടുകൾ നടത്തിയിട്ടുണ്ടോ എന്ന കാര്യവും പോലീസ് അന്വേഷിക്കുന്നുണ്ട്. ചെറിയ തുകയ്ക്കുള്ള നോട്ടുകൾ മുതൽ അച്ചടിച്ചിരുന്നതുകൊണ്ട് സമൂഹത്തിന്‍റെ താഴേത്തട്ടിലേക്കു വരെ കള്ളനോട്ടുകൾ എത്തിയിട്ടുണ്ടെന്ന സംശയവും പോലീസിനുണ്ട്.
അതിനിടെ വിഷയം രാഷ്ട്രീയമായി തന്നെ ഉപയോഗിക്കാനാണ് സിപിഎം തീരുമാനം. രാഗേഷിന്‍റെ സംസ്ഥാന നേതാക്കളുമായുള്ള ബന്ധത്തെക്കുറിച്ച് വിശദമായ അന്വേഷണം വേണമെന്ന് സിപിഎം തൃശൂർ ജില്ലാ സെക്രട്ടറി കെ.രാധാകൃഷ്ണൻ ആവശ്യപ്പെട്ടു. വലിയ തോതിൽ സംഘപരിവാർ നേതൃത്വം കേരളത്തിലെ പരിപാടികൾക്കായി പണം മുടക്കുന്നുണ്ട്. ഇത് എവിടെ നിന്ന് വരുന്നുവെന്ന് അന്വേഷിക്കണമെന്നും നേതാക്കളുടെ പിന്തുണ ഇയാൾക്ക് ലഭിച്ചിരുന്നോ എന്ന് പരിശോധിക്കണമെന്നും അദ്ദേഹം ആവശ്യപ്പെട്ടു.
രാഗേഷ് അറസ്റ്റിലായതിന് പിന്നാലെ ഇയാൾ സംസ്ഥാന നേതാക്കൾക്കൊപ്പം നിൽക്കുന്ന ചിത്രങ്ങൾ വ്യാപകമായി സോഷ്യൽ മീഡിയയിൽ കൂടി പ്രചരിച്ചത് ബിജെപിക്ക് കനത്ത തിരിച്ചടിയായി. ബി ജെ പി സംസ്ഥാന ജനറൽ സെക്രട്ടറിമാരായ കെ.സുരേന്ദ്രൻ, എം.ടി.രമേശ് തുടങ്ങിയവരോടൊപ്പമുള്ള ചിത്രങ്ങൾ പുറത്തുവന്നതോടെയാണ് ഇയാൾക്ക് പാർട്ടിയിലെ ഉന്നതരുമായി ബന്ധമുണ്ടെന്ന സംശയത്തിന് ആക്കം കൂട്ടി. ഏതാനും വർഷങ്ങൾക്ക് മുന്പുമാത്രം രാഷ്ട്രീയത്തിൽ സജീവമായി പ്രവർത്തിച്ചു തുടങ്ങിയ രാഗേഷിന് വളരെ വേഗത്തിൽ തന്നെ ഉന്നതരുമായി ബന്ധമുണ്ടാക്കിയെടുക്കാൻ കഴിഞ്ഞതായും ആരോപണമുണ്ട്. മുൻപ് വീസ വാഗ്ദാനം ചെയ്തും രാഗേഷ് തട്ടിപ്പ് നടത്തിയിട്ടുണ്ടെന്നാണ് നാട്ടുകാർ പറയുന്നത്. പോലീസ് ഇക്കാര്യവും അന്വേഷിക്കുന്നുണ്ട്.
