കൈയിൽ നിന്നും ഒരു വള താഴെ വീണാൽ അത്ര ഗൗരവമായി എടുക്കേണ്ട കാര്യമില്ലെന്ന് തോന്നും. എന്നാൽ ചൈനയിൽ ഒരു യുവതിയുടെ കൈയിൽ നിന്നും വള താഴെ വീണു പൊട്ടിയപ്പോൾ ഇവരുടെ ബോധം പോകുകയാണുണ്ടായത്. വള പൊട്ടിയതിനല്ല ഇവർ ബോധം കെട്ടത്, ഇതിന്‍റെ വില കേട്ടായിരുന്നു. ചൈനയിലെ യുനാൻ മേഖലയിലെ ഒരു ജ്വല്ലറിയിലായിരുന്നു സംഭവം നടന്നത്.
വള കണ്ടിട്ട് ഇഷ്ടപ്പെട്ട യുവതി ഇത് കൈയിലെടുത്ത് സൗന്ദര്യം ആസ്വദിക്കുന്നതിനിടയിലായിരുന്നു താഴെ വീണ് പൊട്ടിയത്. ഇതിന്‍റെ പ്രൈസ് ടാഗിൽ എഴുതിയ വില കണ്ട് കണ്ണുമിഴിച്ചു പോയ ഇവർ ബോധംകെട്ട് നിലത്തു വീഴുകയായിരുന്നു. 28 ലക്ഷം രൂപയായിരുന്നു ഇതിന്‍റെ വില. ബോധം പോയി നിലത്തുവീണ ഇവരെ സമീപത്തുണ്ടായിരുന്നവരാണ് ആശുപത്രിയിലെത്തിച്ചത്. ഇവരുടെ പക്കൽ നിന്നും നഷ്ടപരിഹാരം സ്വീകരിക്കുമെന്നാണ് ജ്വല്ലറി ഉടമയുടെ പ്രതികരണം. അതേസമയം വളയ്ക്ക് അത്രയ്ക്ക് വിലയില്ലെന്നു പറഞ്ഞ യുവതിയുടെ വീട്ടുകാർ 70,000 യുവാൻ നൽകാമെന്നാണ് ജ്വല്ലറി ഉടമയെ അറിയിച്ചത്.
