പൊൻകുന്നം: കാറിനുള്ളിൽ പ്രസവിച്ച യുവതിയുടെ നവജാതശിശു മരിച്ചു. മുണ്ടക്കയം കോരുത്തോട് സ്വദേശിയായ മുപ്പത്തിരണ്ടുകാരിയാണ് കാറിനുള്ളിൽ പ്രസവിച്ചത്. ഇന്നലെ രാവിലെ ആറിനു പൊൻകുന്നത്തുനിന്നു കോട്ടയം മെഡിക്കൽ കോളജ് ഗൈനക്കോളജി വിഭാഗത്തിലേക്കു വരുന്പോഴാണ് സംഭവം.
പൊൻകുന്നം കോടതിക്കവലയിലുള്ള സ്വകാര്യ ആശുപത്രിയിലാണ് പ്രസവസംബന്ധമായ ചികിത്സയ്ക്കെത്തിയത്. ഗർഭസ്ഥശിശുവിനു ഹൃദയമിടിപ്പ് കുറവായതിനാൽ മെഡിക്കൽ കോളജിലേക്കു പറഞ്ഞയയ്ക്കുകയായിരുന്നു.
ഭർത്താവുമായി കാറിൽ മെഡിക്കൽ കോളജിലേക്കു വരവേ ശക്തമായ പ്രസവവേദന അനുഭവപ്പെട്ടു. മെഡിക്കൽ കോളജ് ആശുപത്രി പരിസരത്ത് എത്താറായപ്പോൾ കഠിനമായ വേദനയെത്തുടർന്നു യുവതി കാറിനുള്ളിൽ പ്രസവിക്കുകയായിരുന്നു.
പ്രസവത്തെത്തുടർന്നു നവജാതശിശു കാറിനുള്ളിലേക്കു വീണു. ആശുപത്രിയിലെത്തി ഉടൻതന്നെ ലേബർ റൂമിൽ പ്രവേശിപ്പിച്ചെങ്കിലും പെൺകുഞ്ഞായ നവജാതശിശു മരണപ്പെട്ടു. യുവതിയുടെ ആരോഗ്യനില തൃപ്തികരമാണെന്നും സീറ്റിൽനിന്നു നവജാത ശിശു കാറിനുള്ളിലേക്കു വീണതുമൂലമുള്ള ക്ഷതമാണു മരണകാരണമെന്നും ഡോക്ടർമാർ അറിയിച്ചു.
