ചിറ്റൂർ: ഭാര്യയെ കഴുത്തുഞെരിച്ചു കൊലപ്പെടുത്തിയശേഷം സ്വഭാവിക മരണമെന്നു വരുത്തിതീർത്ത് സംസ്കരിക്കാൻ ശ്രമിച്ച ഭർത്താവിനെ കൊഴിഞ്ഞാന്പാറ പോലീസ് കസ്റ്റഡിയിലെടുത്തു. വേലന്താവളം ഒഴലപ്പതി മൊട്ടബോയന്റെ മകൾ സരോജിനി (36)യെയാണ് ഭർത്താവ് കരികാട്ടിയാർകളം കൗണ്ടൻകളം ചിന്നന്‍റെ മകൻ പഞ്ചവർണം (40) കൊലപ്പെടുത്തിയത്.
ഇന്നലെ പുലർച്ചെ അഞ്ചിന് കൗണ്ടൻകുളത്തെ ഭർതൃവീട്ടിലായിരുന്നു കൊലപാതകം. തുടർന്ന് ബന്ധുക്കളെ സ്വാഭാവിക മരണമെന്ന് അറിയിച്ച് മൃതദേഹം സംസ്കരിക്കാൻ ശ്രമിക്കുകയായിരുന്നു.എന്നാൽ ആരോഗ്യവതിയായ സരോജിനിയുടെ മരണത്തിൽ സംശയം തോന്നിയ ഒരാൾ കൊഴിഞ്ഞാന്പാറ പോലീസിൽ വിവരം അറിയിക്കുകയായിരുന്നു.
എസ്ഐ സജികുമാറും സംഘവും സ്ഥലത്തെത്തി മൃതദേഹം കൊഴിഞ്ഞാന്പാറയിലെ സ്വകാര്യ ആശുപത്രിയിൽ എത്തിച്ചു പരിശോധിച്ചതിനെ തുടർന്നു മരണത്തിൽ സംശയമുണ്ടെന്ന് ഡോക്ടർ അറിയിച്ചു. തുടർന്നു മൃതദേഹം മെഡിക്കൽ കോളജ് ആശുപത്രിയിൽ പോസ്റ്റുമോർട്ടം നടത്തിയപ്പോൾ കഴുത്തു ഞെരിച്ചതിനെ തുടർന്നാണ് മരണമെന്നു കണ്ടെത്തി. ഇതേ തുടർന്ന് ഇന്നലെ രാത്രി 8.30ന് പഞ്ചവർണത്തെ കസ്റ്റഡിയിലെടുത്തു ചോദ്യംചെയ്യലിൽ ഇയാൾ കുറ്റം സമ്മതിച്ചു.
സംഭവത്തെക്കുറിച്ച് പോലീസ് പറയുന്നതിങ്ങനെ: പഞ്ചവർണത്തിനു പ്രദേശത്തെ മറ്റൊരു യുവതിയുമായി അടുപ്പമുണ്ടായിരുന്നു. ഇതു ചോദ്യം ചെയ്ത് ഇവർ തമ്മിൽ വഴക്കും പതിവായിരുന്നു.ഇക്കാര്യത്തെച്ചൊല്ലി പലതവണ ഇയാൾ സരോജിനിയെ മർദിക്കാറുമുണ്ട്. കാമുകിയുമായി ഇനിയും അടുത്താൽ താൻ സ്വന്തം വീട്ടിലേക്കു പോകുമെന്ന് കഴിഞ്ഞദിവസം സരോജിനി മുന്നറിയിപ്പു നല്കിയിരുന്നു. ഇതിലുള്ള വൈരാഗ്യമാണ് കൊലപാതകത്തിലേക്കു നയിച്ചത്.
