തൊടുപുഴ: യുഡിഎഫ് നടത്തുന്ന രാപ്പകൾ സമരത്തിൽ പങ്കെടുത്തതിൽ വിശദീകരണവുമായി കേരള കോണ്ഗ്രസ്-എം വർക്കിംഗ് ചെയർമാൻ പി.ജെ ജോസഫ്. തൊടുപുഴയിൽ നടന്ന മറ്റൊരു യോഗത്തിൽ പങ്കെടുക്കാനാണ് താൻ അവിടെ എത്തിയതെന്നും കോണ്ഗ്രസ് പ്രവർത്തകർ ക്ഷണിച്ചതിനാൽ ആശംസയർപ്പിക്കുക മാത്രമാണ് ചെയ്തതെന്നും ജോസഫ് വിശദീകരിച്ചു. സമരത്തിൽ പങ്കെടുക്കാൻ ഉദ്യേശിച്ചിരുന്നില്ലെന്നും അദ്ദേഹം കൂട്ടിച്ചേർത്തു.
കേന്ദ്ര സംസ്ഥാന സർക്കാരുകളുടെ നയങ്ങൾക്കെതിരെ സംസ്ഥാന വ്യാപകമായി നടത്തിയ രാപ്പകൽ സമരത്തിനു പിന്തുണയുമായാണ് ജോസഫ് തൊടുപുഴയിലെ സമരവേദിയിലെത്തിയത്. പതിനഞ്ചുമിനിറ്റോളം പ്രസംഗിച്ച അദ്ദേഹം കേന്ദ്ര-സംസ്ഥാന സർക്കാരുകൾക്കെതിരേ കനത്ത വിമർശനങ്ങളും ഉന്നയിച്ചു.
തിരുവനന്തപുരത്ത് സെക്രട്ടറിയേറ്റിന് മുന്നിൽ കെപിസിസി അധ്യക്ഷൻ എം.എം.ഹസനാണ് സമര ഉദ്ഘാടനം ചെയ്തത്.
