കോട്ടയം: മദ്യം വാങ്ങാനെത്തിയവർ നടത്തിയ വാക്കുതർക്കം അടിപിടിയിൽ കലാശിച്ചു. ഒരാൾക്ക് കല്ലിനിടിയേറ്റു. ഇന്നലെ രാത്രി 8.45ഓടെ നാഗന്പടത്തെ ബിവറേജസ് ഒൗട്ട്‌‌ലെറ്റിനു മുൻപിലാണ് സംഭവം. ആറ് പ്രതികളെ ഈസ്റ്റ് പോലീസ് അറസ്റ്റ് ചെയ്തു. തിരുവാർപ്പ് കിളിരൂർ സ്വദേശി ശ്യാം എസ് തന്പി (27)ക്കാണ് പരിക്കേറ്റത്.
ഇയാളെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. കല്ലിനിടിയേറ്റ് കഴുത്തിനാണ് പരിക്ക്. രഞ്ജിത്, അജയൻ, രഹിലാൽ, അരുണ്‍, തോമസ്, കിരണ്‍ എന്നിവരാണ് പിടിയിലായത്. ഇതിൽ രഞ്ജിത്, അജയൻ, രഹിലാൽ എന്നിവർ പുതുപ്പള്ളി സ്വദേശികളാണ്. ഇന്നലെ രാത്രി പിടിയിലായവരുടെ അറസ്റ്റ് ഇന്നു പുലർച്ചെയാണ് രേഖപ്പെടുത്തിയത്.
മദ്യം വാങ്ങാനെത്തിയ യുവാവ് ക്യൂവിൽ നിന്ന മറ്റൊരാളുമായി വാക്കുതർക്കം ഉണ്ടായതാണ് ആക്രമണത്തിന് കാരണം. തുടർന്ന് ഇയാളുടെ നേതൃത്വത്തിൽ ഒരു സംഘമെത്തി വാക്കുതർക്കമുണ്ടായ ആളെ ആക്രമിക്കുകയായിരുന്നു.
പിന്നീട് ഇവർ സംഘം ചേർന്നു ബിവറേജിനു മുന്നിൽ ഏറ്റുമുട്ടി. സംഭവസ്ഥലത്ത് പോലീസ് എത്തുന്നതറിഞ്ഞ് ഇരു കൂട്ടരും ഓടിരക്ഷപ്പെടുകയായിരുന്നു. ഒൻപത് മണിക്കാണ് ബിവറേജസ് അടയ്ക്കുന്നത്. അതിനു മുൻപായി ക്യൂവിൽ സ്ഥാനം നേടാനുള്ള തിരക്കാണ് വാക്കുതർക്കമുണ്ടാക്കിയത്.
