മലയാള സിനിമാലോകത്ത്, ചുരുങ്ങിയ കാലത്തേയ്ക്കാണെങ്കിലും സൂപ്പര്‍സ്റ്റാറുകള്‍ക്കുപോലും വെല്ലുവിളി ഉയര്‍ത്താന്‍ കഴിഞ്ഞ നടിയാണ് നസ്രിയ നസീം. അതിപ്പോ, അഭിനയത്തിന്റെ കാര്യത്തിലാണെങ്കിലും ആരാധകരുടെ കാര്യത്തിലാണെങ്കിലും. മഞ്ജു വാര്യരെ പോലും പിന്തള്ളി ലേഡി സൂപ്പര്‍സ്റ്റാര്‍, ജൂണിയര്‍ നയന്‍താര എന്നീ പേരുകളെല്ലാം നസ്രിയയെ തേടിയെത്തി. ഫേസ്ബുക്കില്‍ ഏറ്റവും കൂടുതല്‍ ഫാന്‍ ഫോളോവേഴ്‌സ് ഉണ്ടായിരുന്നതും നസ്രിയയ്ക്കായിരുന്നു. പുരുഷ സൂപ്പര്‍സ്റ്റാറുകളെ പലരെയും വളരെ പിന്നിലാക്കിയായിരുന്നു നസ്രിയയുടെ ആ നേട്ടം. ഇതിനിടയില്‍ നസ്രിയയുടെ വിവാഹവും സിനിമയില്‍ നിന്നുള്ള പിന്മാറ്റവും കാരണം ഫേസ്ബുക്ക് ആരാധകരുടെ റെക്കോര്‍ഡ,് നടി മിയ കൈയ്യടക്കി എന്നു മാത്രം. എന്നാല്‍ പ്രശസ്തിയുടെ കൊടുമുടിയില്‍ നില്‍ക്കവെ ഫഹദ് ഫാസിലിന്റെ വധുവായി മാറിയ നസ്രിയ പിന്നീട് അഭിനയത്തില്‍ നിന്നും പിന്മാറുകയായിരുന്നു.
നസ്രിയയുടെ തിരിച്ചു വരവിനായി ആരാധകര്‍ നാളുകളായി കാത്തിരിക്കുകയാണ്. ഇടയ്ക്കിടെ ചില വാര്‍ത്തകള്‍ പുറത്തു വന്നെങ്കിലും ഒന്നും സ്ഥിരീകരിക്കപ്പെട്ടിരുന്നില്ല. എന്നാല്‍ അഭ്യൂഹങ്ങള്‍ക്ക് വിരാമിട്ടുകൊണ്ട് തന്റെ തിരിച്ചു വരവ് നസ്രിയ തന്നെ പ്രഖ്യാപിച്ചിരിക്കുകയാണ്. ഫേസ്ബുക്കിലൂടെയാണ് നസ്രിയ തിരിച്ചു വരവ് അറിയിച്ചത്. തന്റെ അടുത്ത ചിത്രം എപ്പോഴാണെന്ന് എല്ലാവരും ചോദിച്ചു കൊണ്ടിരിക്കുന്നതാണെന്നു പറഞ്ഞായിരുന്നു നസ്രിയ തിരിച്ചു വരവ് പ്രഖ്യാപിച്ചത്. പൃഥ്വിരാജ്, പാര്‍വ്വതി എന്നിവര്‍ക്കൊപ്പം അഞ്ജലി മേനോന്‍ സംവിധാനം ചെയ്യുന്ന ചിത്രത്തിലൂടെയായിരിക്കും തന്റെ തിരിച്ചുവരവെന്നും നസ്രിയ അറിയിച്ചു. അതേസമയം, നസ്രിയയുടെ പോസ്റ്റിനെ വന്‍ ആവേശത്തോടെയാണ് ആരാധകര്‍ സ്വീകരിച്ചിരിക്കുന്നത്. മണിക്കൂറുകള്‍ക്കകം ആയിരക്കണക്കിന് ലൈക്കുകളും ഷെയറുകളുമാണ് പോസ്റ്റിന് ലഭിച്ചത്.
