കോട്ടയം: പോലീസുകാരന്‍റെ വീട്ടിൽനിന്ന് മൊബൈൽഫോണും പണവും മോഷ്ടിച്ചയാളെ പള്ളിക്കത്തോട് പോലീസ് കുടുക്കി. പോലീസ് ഡിപ്പാർട്ടുമെന്‍റ് നല്കിയ ഫോണ് കള്ളൻ വിൽക്കാൻ ശ്രമിച്ചെങ്കിലും ആരും വാങ്ങിയില്ല. അങ്ങനെ ഫോണ് കൈയിൽ വച്ചതാണ് കള്ളനെ കുടുക്കാൻ കഴിഞ്ഞത്. വടവാതൂർ കൊച്ചുപറന്പിൽ അനീഷ് (32) ആണ് പിടിയിലായത്. ഇയാളുടെ പക്കൽനിന്ന് മൊബൈൽ ഫോണ് കണ്ടെടുത്തു.
കഴിഞ്ഞ ദിവസം ഉച്ചകഴിഞ്ഞ് രണ്ടിനും മൂന്നിനും ഇടയ്ക്കാണ് മോഷണം. കോട്ടയം എആർ ക്യാന്പിലെ സീനിയർ സിപിഒ ജയിംസ്കുട്ടിയുടെ പള്ളിക്കത്തോട് പറപ്പള്ളിക്കുന്ന് ഭാഗത്തുള്ള വീട്ടിലാണ് കവർച്ച നടത്തിയത്. മോഷണം നടന്ന ദിവസം പകൽ ജോലി അന്വേഷിച്ച് അനീഷ് പോലീസുകാരന്‍റെ വീടിനു സമീപത്ത് എത്തിയിരുന്നു. അന്ന് പോലീസുകാരന്‍റെ വീട്ടിൽ ആളുണ്ടായിരുന്നില്ല.
വീട്ടിൽ ആളില്ലെന്നു മനസിലാക്കി അടുക്കളയുടെ വാതിൽ തകർത്ത് അകത്തു കടന്ന പ്രതി മൊബൈൽ ഫോണും 2000 രൂപയുമാണ് കവർച്ച ചെയ്തത്. ഫോണ് ലൊക്കേഷൻ മനസിലാക്കിയാണ് പോലീസ് പ്രതിയെ കുടുക്കിയത്.
