കോട്ടയം: അയ്മനം കരീമഠത്ത് സിപിഎം പ്രവർത്തകരെ സംഘമായി എത്തി ആക്രമിച്ചവരെ പോലീസ് അറസ്റ്റു ചെയ്തു. ബിജെപി പ്രവർത്തകരായ വിജേഷ്കുമാർ(27), അനന്തു കെ. ബൈജു(22), സൗരവ്(18), ഇ.എം. വിഷ്ണു(26), എ.കെ. വിശ്വംഭരൻ(65) എന്നിവരെയാണ് വെസ്റ്റ് സിഐ നിർമ്മൽ ബോസിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
കഴിഞ്ഞ ദിവസം രാത്രി 11ന് കരീമഠം സ്കൂളിന് സമീപമായിരുന്നു സംഭവം. ആക്രമണത്തിൽ സിപിഎം ചീപ്പുങ്കൽ ബ്രാഞ്ച് സെക്രട്ടറി വിപിൻസദനം വിപിൻകുമാറിന്(40) തലയ്ക്ക് ഗുരുതരമായി പരിക്കേറ്റിരുന്നു. ബഹളം കേട്ട് എത്തിയ സിപിഎം പ്രവർത്തകരായ കരീമഠം സ്വദേശികളായ സുദർശനൻ(58), രവീന്ദ്രൻ(54) എന്നിവരെയും സംഘം ആക്രമിച്ചു. വിപിൻ കുമാർ, സുദർശനൻ എന്നിവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ചെത്തുതൊഴിലാളിയായ വിപിൻകുമാർ രാത്രി വീട്ടിലേക്കു വരുന്ന വഴിയായിരുന്നു ആക്രമണം നടത്തിയത്. നിലത്തുവീണ വിപിൻകുമാറിന്‍റെ തലയ്ക്ക് കല്ലുകൊണ്ട് ഇടിക്കുകയായിരുന്നു. രക്തം വാർന്നു കിടന്ന വിപിൻ കുമാറിനെ ആശുപത്രിയിലെത്തിക്കാനുള്ള ശ്രമത്തിനിടയിലാണ് സുദർശനൻ, രവീന്ദ്രൻ എന്നിവർക്ക് മർദ്ദനമേറ്റത്. അക്രമികൾ വടിവാൾ ഉപയോഗിച്ചു ഭീഷണിപ്പെടുത്തിയതായും പരാതിയുണ്ട്.
വെസ്റ്റ് എസ്ഐ എം.ജെ. അരുണിന്‍റെ നേതൃത്വത്തിലുള്ള പോലീസ് സംഘമാണ് തെരച്ചിലിനൊടുവിൽ അക്രമികളെ പിടികൂടിയത്. ഇവരെ പിന്നീട് സ്റ്റേഷൻ ജാമ്യത്തിൽ വിട്ടയച്ചു. സംഘർഷ സാധ്യത മുന്നിൽക്കണ്ട് പ്രദേശത്ത് പോലീസ് പരിശോധന ശക്തമാക്കി.
