ആലപ്പുഴ: പാറാവുകാരനെ തള്ളിയിട്ടശേഷം കടന്നുകളഞ്ഞ പ്രതിയ്ക്കായി പോലീസ് തെരച്ചിൽ ഉൗർജിതമാക്കി. കോഴിക്കോട് തീക്കുനിവേളം ഒതലത്ത് വീട്ടിൽ അജനാസിനെ പിടികൂടാനായാണ് സൗത്ത് പോലീസ് തെരച്ചിൽ ഉൗർജിതമാക്കിയത്. ഇന്നലെ ഉച്ചയോടെയാണ് ഇയാൾ സ്റ്റേഷനിൽ നിന്നും പാറാവുകാരനെ തള്ളിയിട്ടശേഷം ഓടി രക്ഷപ്പെട്ടത്.
ഇയാളെ പിടികൂടുന്നതിനായി പിന്നാലെയോടിയ പോലീസ് ഉദ്യോഗസ്ഥന് പരിക്കേറ്റിരുന്നു. ഇന്നലെ രാവിലെ 8.30 ഓടെ ആലപ്പുഴ റെയിൽവേ സ്റ്റേഷനിൽ നിന്നുമാണ് അജനാസിനെ 20 ഗ്രാം കഞ്ചാവുമായി പിടികൂടിയത്. ഇയാളെ കൂടുതൽ ചോദ്യം ചെയ്യുന്നതിനായി സ്റ്റേഷനിലെത്തിച്ചു.
ഉച്ചയോടെ ഡ്യൂട്ടിയിലുണ്ടായിരുന്ന ഉദ്യോഗസ്ഥർ ഉച്ചഭക്ഷണം കഴിക്കാൻ പോയ സമയത്ത് സ്റ്റേഷനിൽ നിർത്തിയിരിക്കുകയായിരുന്ന ഇയാൾ പാറാവുകാരനെ തള്ളിയിട്ടശേഷം സമീപത്തെ മതിൽ ചാടി രക്ഷപ്പെടുകയായിരുന്നു. ഇയാൾ എത്തിച്ചേരാൻ സാധ്യതയുള്ള സ്ഥലങ്ങളിലൊക്കെ പോലീസ് പരിശോധന നടത്തുന്നുണ്ട്. സ്റ്റേഷനിൽ നിന്നും കടന്നുകളഞ്ഞതുമായി ബന്ധപ്പെട്ട് മറ്റൊരു കേസും സൗത്ത് പോലീസ് രജിസ്റ്റർ ചെയ്തിട്ടുണ്ട്.
