കോട്ടയം: നിലവിലെ സെക്രട്ടറി വി.എൻ.വാസവൻ സെക്രട്ടറിയായി തുടരും. സംസ്ഥാന നേതൃത്വത്തിനും ഇക്കാര്യത്തിൽ മറ്റൊരഭിപ്രായമില്ല. എന്നാൽ ജില്ലാ കമ്മിറ്റിയിൽ അഴിച്ചു പണിക്ക് നേതൃത്വം ശ്രമം നടത്തുന്നുണ്ട്. 35 അംഗ ജില്ലാ കമ്മിറ്റിയിൽ ഇപ്പോൾ നിലവിൽ രണ്ട് ഒഴിവുകളുണ്ട്. വി.പി. ഇബ്രാഹിം, വി.എൻ.ശശിധരൻ എന്നിവരുടെ ഒഴിവുകളാണുള്ളത്. ഒരംഗത്തെകൂടി ഉൾപ്പെടുത്തി 36 അംഗ കമ്മിറ്റിയാക്കാൻ സംസ്ഥാന നേതൃത്വം നിർദേശിച്ചിട്ടുണ്ട്.
സംസ്ഥാന സെക്രട്ടേറിയേറ്റംഗമായി തെരഞ്ഞെടുക്കപ്പെട്ട കെ.ജെ.തോമസ് ജില്ലാ കമ്മിറ്റിയിൽ നിന്ന് ഒഴിവായേക്കും. മുതിർന്ന അംഗങ്ങളായ പി.എൻ.പ്രഭാകരൻ, കെ.സി.ജോസഫ്, അയ്മനം ബാബു, ആർ.ടി. മധുസുധനൻ എന്നിവരെ പ്രായാധിക്യം കാരണം ഒഴിവാക്കാനും സാധ്യതയുണ്ട്.
പുതിയ കമ്മിറ്റിയിൽ യുവജന മഹിളാ വിദ്യാർഥി പ്രാതിനിധ്യം വർധിപ്പിക്കണമെന്ന കേന്ദ്ര കമ്മിറ്റിയുടെ നിർദേശമുണ്ട്. ഡിവൈഎഫ്ഐ ജില്ലാ സെക്രട്ടറിയും അയർക്കുന്നം ഏരിയാ സെക്രട്ടറിയുമായ പി.എൻ.ബിനു, മഹിളാ അസോസിയേഷൻ സെക്രട്ടറി തങ്കമ്മ ജോർജുകുട്ടി, എസ്എഫ്ഐ സംസ്ഥാന പ്രസിഡന്‍റ് ജയ്ക് സി.തോമസ് എന്നിവർ ജില്ലാ കമ്മിറ്റിയിലെത്തുമെന്നുറപ്പായി.
ഏരിയാ സെക്രട്ടറിമാരിൽ ഏറ്റുമാനൂർ ഏരിയാ സെക്രട്ടറി കെ.എൻ. വേണുഗോപാൽ, തലയോലപ്പറന്പിലെ കെ.ശെൽവരാജ്, വൈക്കത്തെ കെ.അരുണൻ എന്നിവരെയാണ് പരിഗണിക്കുന്നത്. പുതുപ്പള്ളി മുൻ ഏരിയാ സെക്രട്ടറി ഇ.എസ്. സാബുവിനെയും് പരിഗണിക്കുന്നുണ്ട്.
കോട്ടയം: സിപിഎം കോട്ടയം ജില്ലാ സമ്മേളനത്തിന്‍റെ പ്രതിനിധി സമ്മേളനം മാമ്മൻമാപ്പിള ഹാളിൽ ആരംഭിച്ചു. രാവിലെ 9.30ന് മുതിർന്ന നേതാവ് വി.ആർ. ഭാസ്കരൻ പതാക ഉയർത്തി. സമ്മേളനം സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ ഉദ്ഘാടനം ചെയ്തു. നാലിനു സമാപിക്കുന്ന സമ്മേളനം ജില്ലയിലെ വിവിധ വിഷയങ്ങൾ ചർച്ച ചെയ്യും. കേരള കോണ്ഗ്രസുമായുളള അടവു നയവും നിയമസഭ തെരഞ്ഞെടുപ്പിൽ പൂഞ്ഞാർ മണ്ഡലത്തിലെ ഇടതു സ്ഥാനാർഥിയുടെ തോൽവിയും പ്രധാന ചർച്ചയാകുമെന്നാണ് സൂചന.
ജില്ലാ പഞ്ചായത്ത് പ്രസിഡന്‍റ് തെരഞ്ഞെടുപ്പിൽ കേരള കോണ്ഗ്രസ് പ്രതിനിധിക്ക് സിപിഎം അംഗങ്ങൾ വോട്ടു ചെയ്ത അടവു നയത്തേക്കുറിച്ച് പാർട്ടിക്കുള്ളിൽ രണ്ടഭിപ്രായമുണ്ട്. സംസ്ഥാന നേതൃത്വത്തിന്‍റെ അറിവോടെയാണ് അടവു നയം നടപ്പാക്കിയതെങ്കിലും പ്രതിനിധികൾ വിഷയം ചൂടേറിയ ചർച്ചയ്ക്കു വിധേയമാക്കും. പൂഞ്ഞാറിൽ ഇടതു സ്ഥാനാർഥിയുടെ തോൽവിയാണ് സമ്മേളനത്തിൽ മറ്റൊരു ചർച്ചാ വിഷയം.
പരാജയത്തെ തുടർന്ന് പൂഞ്ഞാർ, കാഞ്ഞിരപ്പള്ളി ഏരിയാ കമ്മിറ്റികൾ പുനസംഘടിപ്പിക്കുകയും കമ്മീഷൻ കുറ്റക്കാരനെന്നു കണ്ടെത്തിയ ജില്ലാ സെക്രട്ടേറിയേറ്റംഗം ഉൾപ്പെടെയുള്ളവർക്കെതിരെ നടപടിയെടുക്കുകയും ചെയ്തിരുന്നു. നടപടിക്കു വിധേയരായവരുടെ നേതൃത്വത്തിൽ പൂഞ്ഞാറിലും കാഞ്ഞിരപ്പള്ളിയിലും ഏരിയാ സമ്മേളനത്തിൽ മത്സരം സൃഷ്ടിക്കുകയും വിഭാഗിയത ഉണ്ടാക്കുകയും ചെയ്തത് ജില്ലാ നേതൃത്വം ഗൗരവമായിട്ടാണു കാണുന്നത്.
രണ്ടിടത്തും ഏരിയാ കമ്മിറ്റിയിലേക്ക് വാശിയേറിയ മത്സരവും നടന്നിരുന്നു.പുതുപ്പള്ളി ഏരിയാ സമ്മേളനത്തിൽ നിലവിലെ ഏരിയാ സെക്രട്ടറി ഏരിയാ കമ്മിറ്റിയിൽ ഉൾപ്പെടാതെ പോയതും സെക്രട്ടറി സ്ഥാനത്തേക്ക് മത്സരം ഉണ്ടായതും പാലായിൽ നിലവിലെ സെക്രട്ടറി ദയനീയമായി പരാജയപ്പെട്ടതും സമ്മേളനത്തിൽ ചർച്ചയാകും.
കോട്ടയത്ത് ഇടതു സ്ഥാനാർഥിയായിരുന്ന റെജി സഖറിയായുടെ ദയനീയ പരാജയവും ചർച്ചയാകും. ഇന്നലെ വൈകുന്നേരം സമ്മേളനത്തിനു പതാക ഉയർന്നു. വിവിധ കേന്ദ്രങ്ങളിൽ നിന്നെത്തിയ കൊടി, കൊടിമര, ബാനർ ജാഥകൾ തിരുനക്കരയിൽ സംഗമിച്ചു. തുടർന്നു സ്വാഗത സംഘം ചെയർമാൻ കെ. സുരേഷ്കുറുപ്പ് എംഎൽഎ പതാക ഉയർത്തി. നാലിന് ചുവപ്പുസേനമാർച്ച്, ബഹുജനറാലി എന്നിവയോടെ സമ്മേളനം സമാപിക്കും.
മാമ്മൻ മാപ്പിള ഹാളിൽ നടക്കുന്ന പ്രതിനിധി സമ്മേളനത്തിൽ 12 ഏരിയാകളിൽ നിന്നും തെരഞ്ഞെടുക്കപ്പെട്ട 257 പ്രതിനിധികളും 33 ജില്ലാ കമ്മിറ്റിയംഗങ്ങളുമാണ് പങ്കെടുക്കുന്നത്. സിപിഎം കോടിയേരിക്കു പുറമേ കേന്ദ്ര കമ്മിറ്റിയംഗങ്ങളായ വൈക്കം വിശ്വൻ, ഡോ. തോമസ് ഐസക്, പി.കെ. ശ്രീമതി, എം.സി. ജോസഫൈൻ, സംസ്ഥാന സെക്രട്ടേറിയേറ്റംഗങ്ങളായ ആനത്തലവട്ടം ആനന്ദൻ, ബേബി ജോണ്, എം.എം.മണി, കെ.ജെ. തോമസ് എന്നിവർ മുഴുവൻ സമയവും സമ്മേളനത്തിലുണ്ടാകും.
