ഈരാറ്റുപേട്ട: ബൈക്ക് നിയന്ത്രണംവിട്ടു മതിലിലിടിച്ചു യുവാവ് മരിച്ചു. ഒരാൾക്കു പരിക്കേറ്റു. പിണ്ണാക്കനാട് നടയിൽ ബെന്നിയുടെ മകൻ ബിൻസ് ബെന്നി (22) ആണ് മരിച്ചത്. പിണ്ണാക്കനാട് സ്വദേശി മണ്ണിപ്പറന്പിൽ രാഹുലി(20) നാണ് പരിക്കേറ്റത്. ഇന്നലെ രാത്രി 12.45നു നാണു പിണ്ണാക്കനാടിനു സമീപം മൈലാടിയിൽ വച്ചാണു അപകടമുണ്ടായത്. തിടനാട് പോലീസ് കാളകെട്ടിയിൽ വാഹന പരിശോധന നടത്തുന്നതിനിടയിലാണു ബിൻസും രാഹുലും സഞ്ചരിച്ചിരുന്ന ബൈക്ക് എത്തിയത്.
പോലീസ് കൈ കാണിച്ചിട്ടും നിർത്താതെ പോയ ബൈക്കിനെ പോലീസ് പിന്തുടർന്നപ്പോഴാണു അപകടമുണ്ടായതെന്നാണ് ആരോപണം. പിണ്ണാക്കനാട് പെട്രോൾ പന്പിലെ ജീവനക്കാരനാണ് ബിൻസ്. ഇയാൾ തന്നെയാണു ബൈക്ക് ഓടിച്ചിരുന്നതും. പരിക്കേറ്റ രാഹുൽ സ്വകാര്യ ആശുപത്രിയിൽ ചികിത്സയിലാണ്. നിയന്ത്രംവിട്ട ബൈക്ക് കരിങ്കൽ ഉപയോഗിച്ചു കെട്ടിയിരുന്ന മതിലിൽ ഇടിക്കുകയായിരുന്നു.
അപകടത്തിൽ പരിക്കേറ്റു റോഡിൽ കിടന്ന ഇവരെ പോലീസ് സ്വകാര്യ ആശുപത്രിയിൽ എത്തിച്ചെങ്കിലും ബിൻസിന്‍റെ ജീവൻ രക്ഷിക്കാനായില്ല. അതേസമയം രാത്രിയിൽ കാളകെട്ടിയിൽ വാഹന പരിശോധന നടത്തിയിട്ടില്ലെന്നും പട്രോളിംഗ് നടത്തുന്നതിടയിൽ പരിക്കേറ്റു റോഡിൽ കിടന്ന ബൈക്ക് യാത്രികരെ ആശുപത്രിയിലെത്തിക്കുക മാത്രമാണു ചെയ്തതെന്നും തിടനാട് പോലീസ് പറഞ്ഞു. ു
