മലയാളത്തിലെ എക്കാലത്തെയും സൂപ്പര്‍ഹിറ്റ് ചിത്രങ്ങളില്‍ ഒന്നായിരുന്നു ഫാസില്‍ സംവിധാനം ചെയ്ത മണിച്ചിത്രത്താഴ്. മോഹന്‍ലാല്‍ ശോഭന, സുരേഷ് ഗോപി എന്നിവരാണു മുഖ്യകഥാപാത്രങ്ങളെ അവതരിപ്പിച്ചത്. ശോഭന അവതരിപ്പിച്ച ഗംഗ എന്ന കഥാപാത്രം നാഗവല്ലിയായി മാറുമ്പോള്‍ നാഗവല്ലിയുടെ കാമുകനായി വരുന്ന രാമനാഥനും ഏറെ ശ്രദ്ധിക്കപ്പെട്ടു.
കുറച്ചു രംഗങ്ങളില്‍ മാത്രമേ ഉള്ളായിരുന്നെങ്കിലും രാമനാഥനെയും മലയാളികള്‍ നെഞ്ചേറ്റി. രാമനാഥനായി വേഷമിട്ടതു പ്രശ്‌സ്ത നര്‍ത്തകനും കന്നഡ നടനുമായ ശ്രീധറായിരുന്നു. ചിത്രത്തില്‍ ശോഭനയും ശ്രീധറും തമ്മിലുള്ള നൃത്തം ഏറെ ശ്രദ്ധിക്കപ്പെട്ടിരുന്നു. നര്‍ത്തകിയായ അനുരാധയെ വിവാഹം കഴിച്ച ശ്രീധര്‍ പിന്നീട് നൃത്തത്തില്‍ സജീവമാകുകയായിരുന്നു. അനുരാധയ്‌ക്കൊപ്പം ഇപ്പോഴും നൃത്തരംഗത്തു സജീവമായി നില്‍ക്കുകയാണു ശ്രീധര്‍.
