വൈ.എസ്. ജയകുമാർ
തിരുവനന്തപുരം: ഭക്തലക്ഷങ്ങൾ പൊങ്കാലയിട്ടതോടെ തിരുവനന്തപുരം നഗരം പൊങ്കാലക്കളമായിമാറി. ക്ഷേത്രമുറ്റത്തെ പണ്ടാര അടുപ്പിൽ തീതെളിച്ചതായി അറിയിച്ച് ചെണ്ടമേളം ഉയർന്നതോടെ നഗരത്തിലെ പൊങ്കാല അടുപ്പുകളിലേക്ക് തീപകർന്നു.
ക്ഷേത്രം സ്ഥിതി ചെയ്യുന്ന ആറ്റുകാലും ചുറ്റുപാടുകളും കിഴക്കേകോട്ട, തന്പാനൂർ പ്രദേശങ്ങളും പിന്നിട്ട് പാളയം, പട്ടം, കേശവദാസപുരം, നാലാഞ്ചിറ ഭാഗത്തോളവും വെള്ളയന്പലം പേരൂർക്കടയിലേക്കും പൊങ്കാല കലങ്ങൾ നിരന്നു. ബൈപ്പാസിൽ തിരുവല്ല മുതൽ ആക്കുളംവരേയും കലങ്ങൾ നിരന്നുരാവിലെ 9.45-ന് ശുദ്ധപുണ്യാഹം തളിച്ചതോടെയാണ് ചടങ്ങുകൾക്കു തുടക്കമായത്.
ക്ഷേത്രമുറ്റത്ത് കണ്ണകീചരിതം പാടിയ തോറ്റം പാട്ടുകാർ ചിലപ്പതികാരത്തിൽ പാണ്ഡ്യരാജാവിനെ കണ്ണകി വധിച്ച ഭാഗം പാടിത്തീർന്നന്പോൾ ക്ഷേത്ര തന്ത്രി തെക്കേടത്തു പരമേശ്വരൻ വാസുദേവൻ ഭട്ടതിരിപ്പാട് ദീപം പകർന്ന് മേൽശാന്തി വാമനൻ നന്പൂതിരിക്ക് കൈമാറി.
മേൽശാന്തി ക്ഷേത്രത്തിലേക്കുള്ള നിവേദ്യങ്ങൾ ഒരുക്കുന്ന മടപ്പള്ളിയിലെ പൊങ്കാല അടുപ്പിൽ തീപകർന്നു. അതിനുശേഷം ദീപം സഹമേൽശാന്തിക്കു കൈമാറി. സഹമേൽശാന്തി വലിയ തിടപ്പള്ളിയിലും ക്ഷേത്രമുറ്റത്തെ പണ്ടാര അടുപ്പിലും തീകത്തിക്കുകയായിരുന്നു. പൊങ്കാലയ്ക്കു പുറമേ തെരളി, മണ്ടപ്പുറ്റ് തുടങ്ങിയവയും ഭക്തർ ഒരുക്കി.ഉച്ചയ്ക്ക് 2.30-നാണ് പൊങ്കാല നിവേദിക്കും.
ക്ഷേത്രത്തിൽ നിന്നു നിയോഗിച്ചിട്ടുള്ള 55 സഹപൂജാരിമാർ പുണ്യാഹം തളിക്കുന്പോൾ ആകാശത്തു നിന്ന് പുഷ്പവൃഷ്ടി നടത്തും.രാത്രി 7.45-ന് ക്ഷേത്രാങ്കണത്തിൽ വ്രതമെടുത്തു കഴിയുന്ന ബാലന്മാർക്ക് ചൂരൽ കുത്താനാരംഭിക്കും. രാത്രി ഭഗവതിയുടെ തിടന്പുമായി പുറത്തേക്കെഴുന്നള്ളത്ത് ആരംഭിക്കും.
പറയെടുപ്പ് പൂർത്തിയാക്കി മണക്കാട് ശ്രീധർമശാസ്താക്ഷേത്രത്തിലെത്തിയശേഷം മടക്കയാത്ര തുടങ്ങും.പുറത്തേക്കെഴുന്നള്ളിപ്പിന് മുത്തുക്കുടകൾ, ആലവട്ടം, വെഞ്ചാമരം, സായുധ പോലീസ്, ഫ്ളോട്ടുകൾ തുടങ്ങിയവ അകന്പടി സേവിക്കും. പല്ലശന നന്ദകുമാറിന്‍റെ നേതൃത്വത്തിൽ സ്പെഷൽ പഞ്ചവാദ്യം ഉണ്ടായിരിക്കും.
ഇന്നു പുലർച്ചെ മുതൽ ബാലികമാരുടെ നേർച്ചയായ താലപ്പൊലി ആരംഭിച്ചു. വൈകുന്നേരംവരെ താലപ്പൊലി വരവ് തുടരും. നാളെ രാത്രി ഒന്പതിന് കാപ്പഴിക്കും. രാത്രി 12.30-ന് കുരുതിയോടെ ഉത്സവം സമാപിക്കും.പൊങ്കാല പ്രദേശങ്ങളിൽ ഇന്നലെ മുതലേ വിവിധ സംഘടനകളുടെ നേതൃത്വത്തിൽ രാത്രി കലാപരിപാടികൾ അരങ്ങേറി. രാവിലെ മുതൽ നൂറുകണക്കിന് സ്ഥലങ്ങളിൽ രാവിലെയും ഉച്ചയ്ക്കും അന്നദാനവും നടന്നു.
