കോട്ടയം: പിണങ്ങിപ്പോയ ഭാര്യയെ തിരികെ കൊണ്ടുവരാൻ പൂജ നടത്തിയെന്നു വിശ്വസിപ്പിച്ച് പണം തട്ടിയെടുത്ത കേസിൽ ദന്പതികൾക്ക് തടവും പിഴയും. പാന്പാടി തേക്കുങ്കൽ രാജമ്മ പത്രോസ് (60), ഭർത്താവ് ടി.എം. പത്രോസ് (64) എന്നിവരെ മൂന്നു വർഷം തടവിനും പതിനായിരം രൂപ പിഴ അടയ്ക്കാനും ശിക്ഷിച്ചുകൊണ്ട് ജുഡീഷ്യൽ ഒന്നാം ക്ലാസ് മജിസ്ട്രേട്ട് ഒന്ന് എം.സി. സനിത ഉത്തരവായി. പ്രോസിക്യൂഷനു വേണ്ടി അസിസ്റ്റന്‍റ് പബ്ലിക് പ്രോസിക്യൂട്ടർ ജെ. പത്മകുമാർ ഹാജരായി.
കോഴഞ്ചേരി മെഴുവേലി ചക്കിരേൽതുന്പേൽ റോബിൻ മാത്യു (മാത്തൻ)വിനെ കബളിപ്പിച്ച് 50300 യുഎസ് ഡോളർ ( ഉദേശം 25 ലക്ഷം രൂപ) തട്ടിയെടുത്തു എന്നാണ് കേസ്. റോബിന്റെ മാതൃസഹോദരിയാണ് പ്രതി രാജമ്മ. 2004 ഓഗസ്റ്റ് മുതൽ 2007 മാർച്ച് വരെ പല തവണയായി രാജമ്മയുടെ ഫെഡറൽ ബാങ്ക് പാന്പാടി ശാഖയിലുള്ള അക്കൗണ്ടിലേക്കാണ് പണം നല്കിയത്.
റോബിനും ഭാര്യയും അമേരിക്കയിലായിരുന്നു. പിണങ്ങിക്കഴിയുന്ന റോബിന്റെ ഭാര്യയെ തിരികെ കൊണ്ടു വരുന്നതിന് ചങ്ങനാശേരിയിലുള്ള ഒരു സ്വാമിയെക്കൊണ്ട് പൂജ നടത്തിയെന്നു വിശ്വസിപ്പിച്ച് പണം തട്ടിയെടുത്തു എന്നാണ് കേസ്. സ്വാമി പൂജിച്ചുവെന്നു വിശ്വസിപ്പിച്ച് ഒരു രുദ്രാക്ഷ മാല റോബിന് അയച്ചുകൊടുത്തിരുന്നു. മാല അണിഞ്ഞാൽ എല്ലാ പ്രശ്നവും തീരുമെന്നും വിശ്വസിപ്പിച്ചു. എന്നാൽ പ്രശ്നം തീർന്നില്ല.
പിന്നീട് റോബിൻ നാട്ടിലെത്തിയപ്പോൾ സ്വാമിയെ കാണണമെന്നു പറഞ്ഞെങ്കിലും അത് അപകടം സംഭവിക്കുമെന്നു പറഞ്ഞ് അനുവദിച്ചില്ല.പിന്നീടാണ് ഇത് തട്ടിപ്പായിരുന്നുവെന്ന് ബോധ്യപ്പെട്ട് പോലീസിൽ പരാതി നല്കിയത്. പാന്പാടി പോലീസ് ആണ് കേസെടുത്ത് കോടതിയിൽ ചാർജ് നല്കിയത്. അപ്പീൽ നല്കുന്നതിനായി പ്രതികൾക്കു കോടതി ജാമ്യം അനുവദിച്ചു.
