ഒരൊറ്റ കണ്ണിറുക്കലിലൂടെ ലോകജനതയുടെ തന്നെ ശ്രദ്ധാകേന്ദ്രമായിരിക്കുകയാണ് ഒരു അഡാറ് ലവ് എന്ന സിനിമയിലെ നായിക പ്രിയാ വാര്യര്‍. അഡാറ് എന്ന വാക്കുതന്നെ ഇപ്പോള്‍ സര്‍വസാധാരണവുമായിരിക്കുകയാണ്.
ഇപ്പോഴിതാ പ്രിയയുടെ കണ്ണിറുക്കല്‍ നിയമസഭയിലും ചര്‍ച്ചയായിരിക്കുന്നു. ഒരു അഡാറ് ലവിലെ നായിക പ്രിയാ വാരിയരുടെ കണ്ണിറുക്കല്‍ ‘നോട്ട ടെക്നോളജി’ യുടെ മാറുന്ന രൂപമാണെന്ന് കവികൂടിയായ മന്ത്രി ജി. സുധാകരനാണ് നിയമസഭയില്‍ പരാമര്‍ഷിച്ചത്. എന്നുവെച്ചാല്‍ ആളുകള്‍ ആളുകളെ നോക്കുന്ന രീതി മാറിക്കൊണ്ടിരിക്കുന്നു. ‘ഒരു കുമാരി മറ്റൊരു കുമാരനെ നോക്കി കണ്ണിറുക്കുന്നതാണ് ഇപ്പോള്‍ ലോകത്തെ ഏറ്റവും വലിയ സംഭവം. ഇങ്ങനെ കണ്ണിറുക്കാന്‍ നമുക്കെല്ലാം പറ്റും. പരിശീലിക്കണമെന്നുമാത്രം’. അദ്ദേഹം പറഞ്ഞു.
തൊഴില്‍സുരക്ഷയില്ലാത്ത ഐ.ടി.മേഖലയിലെ ജീവനക്കാര്‍ക്ക് ക്ഷേമനിധി രൂപവത്കരിക്കണമെന്നാവശ്യപ്പെട്ട് പി.ടി. തോമസ് സ്വകാര്യബില്ലിന് അവതരണാനുമതി തേടിയിരുന്നു. ഇതിന് മറുപടി പറയുകയായിരുന്നു മന്ത്രി. സാങ്കേതികവിദ്യയുടെ വികസനത്തോടെ ഐ.ടി.മേഖലയില്‍ ഒട്ടേറെപ്പേര്‍ക്ക് ജോലി നഷ്ടമാകുന്നുവെന്ന് പി.ടി. തോമസ് പറഞ്ഞു.
ഇത് കേട്ടപ്പോഴാണ് കണ്ണിറുക്കലിലൂടെ വളരുന്ന ‘നോട്ട ടെക്നോളജി’യെക്കുറിച്ച് സുധാകരന് ഓര്‍മവന്നത്. വിദേശത്തെയും സ്വദേശത്തെയും കമ്പനികള്‍ പ്രവര്‍ത്തിക്കുന്ന ഐ.ടി.മേഖലയില്‍ ഏകീകൃതമായ നിയമം പ്രായോഗികമാവില്ലെന്നും മന്ത്രി പറഞ്ഞു.
