ചവറ : വീട്ടിൽ കയറി യുവാവിനെയും സ്ത്രീയേയും പരിക്കേൽപ്പിച്ച കേസിൽ നാലു പേർ അറസ്റ്റിൽ. തൊടിയൂർ വേങ്ങറ സ്വദേശികളായ വിഷ്ണുഭവനിൽ വിഷ്ണു ( 24 ), ആർ.എസ് നിവാസിൽ ശ്യാമപ്രസാദ് ( 25 ), ചെറുതിട്ടയിൽ സുവർണകുമാർ ( 40 ), മഹേഷ് ഭവനിൽ മഹേഷ് ( 30 ) എന്നിവരാണ് അറസ്റ്റിൽ ആയത്.
തൊടിയൂർ അംബേദ്ക്കർ കോളനിയിൽ രാഹുലി ( 23 ) നേയും അക്രമം തടയാനെത്തിയ രാഹുലിന്‍റെ കുഞ്ഞമ്മ ഗീത (42) യേയും വീട്ടിൽ കയറി ആക്രമിച്ച് പരുക്കേൽപ്പിച്ച കേസിലാണ് നാലുപേരും അറസ്റ്റിൽ ആയത്.
ചവറയിലെ പയ്യലക്കാവ് ക്ഷേത്രത്തിനു സമീപമുള്ള ഗീതയുടെ വീട്ടിൽ എത്തിയാണ് രാഹുലിനെ പതിനഞ്ചോളം അക്രമികൾ കഴിഞ്ഞ എട്ടിന് രാത്രി 10.30 ഓടെ വീടിനുള്ളിൽ കയറി ആക്രമിച്ചത്. ഇരുമ്പുവടി കൊണ്ട് കൈകാലുകൾക്ക് പരിക്കേൽപ്പിക്കുകയും വടിവാൾകൊണ്ടു വെട്ടുകയും ചെയ്തു.
തൊടിയൂരിലെ അംബേദ്ക്കർ ഗ്രാമത്തിൽ നിരവധി പ്രവർത്തകർ ആർ എസ് എസ് വിട്ട് ഡിവൈഎഫ്ഐയിൽ ചേർന്നിരുന്നു. തുടർന്ന് ഇവിടെ ആക്രമണ പരമ്പരയായിരുന്നു. ഇതിനെ തുടർന്നാണ് രാഹുൽ ചവറയിലെ കുഞ്ഞമ്മയുടെ വീട്ടിൽ താമസിച്ചു വന്നതെന്ന് പോലീസ് പറഞ്ഞു.
രാഹുൽ ആർ എസ് എസ് വിട്ട് ഡിവൈഎഫ്ഐയിൽ ചേർന്നിരുന്നു. ഇതാണ് അക്രമണത്തിനു കാരണമെന്ന നിഗമനത്തിലാണ് പോലീസ്
