തളിപ്പറമ്പ്: സിപിഎം പ്രവര്‍ത്തകന്‍റെ ബൈക്ക് നശിപ്പിച്ച് തോട്ടിലേക്കെറിഞ്ഞു. തൃച്ചംബരം കൃഷ്ണാലയത്തിലെ പി.രഞ്ജിത്തിന്‍റെ കെഎല്‍ 13 പി-2658 ഗ്ലാമര്‍ ബൈക്കാണ് നശിപ്പിച്ചത്. ഇന്നലെ രാവിലെ കോഴിക്കോട് പോകുമ്പോള്‍ ബൈക്ക് ഡ്രീംപാലസ് ഓഡിറ്റോറിയത്തിന് സമീപത്ത് ബന്ധുവിന്‍റെ വീട്ടിന് സമീപം നിര്‍ത്തിയിട്ടതായിരുന്നു.
രാത്രി 12.30 ന് തിരിച്ചെത്തിയപ്പോള്‍ ഹെല്‍മറ്റ് സ്ഥലത്ത് ഉപേക്ഷിച്ച നിലയില്‍ കാണുകയും ബൈക്ക് കാണാതാവുകയും ചെയ്തതിനെ തുടര്‍ന്ന് നടത്തിയ അന്വേഷണത്തിലാണ് എലത്താളം വയലിലെ പൂന്തുരുത്തി തോട്ടിലെറിഞ്ഞ നിലയില്‍ കണ്ടെത്തിയത്. രാത്രി തന്നെ തളിപ്പറമ്പ് പോലീസ് സ്ഥലത്തെത്തിയിരുന്നു.
രഞ്ജിത്തിന്‍റെ പരാതിയില്‍ പോലീസ് കേസെടുത്ത് അന്വേഷണമാരംഭിച്ചു. ബൈക്ക് സൂക്ഷിച്ചതിന് സമീപത്തായാണ് കഴിഞ്ഞ ദിവസം എസ്എഫ്‌ഐ പ്രവര്‍ത്തകരെ ആക്രമിച്ചത്. സംഭവത്തിന് പിന്നില്‍ ബിജെപി പ്രവര്‍ത്തകരാണെന്ന് സിപിഎം ആരോപിച്ചു.
