പെരുമ്പാവൂര്‍: ബ്രൗണ്‍ ഷുഗറുമായി ഇതരസംസ്ഥാനക്കാരനായ യുവാവിനെ പെരുന്പാവൂർ എക്സൈസ് സംഘം പിടികൂടി. പശ്ചിമ ബംഗാള്‍ മൂര്‍ഷിദാബാദ് സ്വദേശി മൊയാജെം ഹുസൈന്‍ (29) ആണ് അറസ്റ്റിലായത്. പെരുമ്പാവൂര്‍ ടൗണ്‍ പ്രദേശത്ത് നിന്നാണ് ഇയാളെ പിടികൂടിയത്. ഇയാളുടെ പക്കൽ നിന്ന് 61 പൊതി ബ്രൗണ്‍ ഷുഗര്‍ കണ്ടെടുത്തു.
പെരുമ്പാവൂര്‍ എക്സൈസ് ഷാഡോ സംഘത്തിനു ലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് പരിശോധന നടത്തിയത്. എക്സൈസ് ഇന്‍സ്പെക്ടര്‍ ആര്‍. കിരണ്‍ നേതൃത്വത്തില്‍ നടന്ന പരിശോധനയില്‍ അസി. എക്സൈസ് ഇന്‍സ്പെക്ടര്‍ ബി. മുരളീധരന്‍, അസി. എക്സൈസ് ഗ്രേഡ് കെ.കെ. സുബ്രഹ്മണ്യന്‍. സിവില്‍ എക്സൈസ് ഓഫീസര്‍മാരായ എം.എം. കുഞ്ഞുമുഹമ്മദ്, ഗിരീഷ് കൃഷ്ണന്‍, പി.ആര്‍. അനുരാജ്, എം.എം. നന്ദു എന്നിവര്‍ പങ്കെടുത്തു.
ബ്രൗണ്‍ ഷുഗറിന്‍റെ ഉറവിടത്തെക്കുറിച്ച് അന്വേഷണം നടന്നുവരികയാണെന്നും ഇതിനു പിന്നിലുള്ള സംഘത്തെ ഉടന്‍ പിടികൂടുമെന്നും എക്സൈസ് ഇന്‍സ്പെക്ടര്‍ അറിയിച്ചു. പ്രതിയെ പെരുമ്പാവൂര്‍ ഒന്നാം ക്ലാസ്സ് മജിസ്ട്രേറ്റ് കോടതിയില്‍ ഹാജരാക്കി.
