കൊച്ചി: വരാപ്പുഴയിൽ ശ്രീജിത്ത് എന്ന യുവാവ് കസ്റ്റഡിയിൽ മരിച്ച സംഭവത്തിൽ മൂന്ന് പോലീസുകാരെ കസ്റ്റഡിയിൽ എടുത്തു. ശ്രീജിത്തിനെ അറസ്റ്റ് ചെയ്ത കളമശേരി എആർ ക്യാന്പിലെ പോലീസുകാരായ ജിതിൻ രാജ്, സന്തോഷ്കുമാർ, സുമേഷ് എന്നിവരെയാണ് ഐജി എസ്. ശ്രീജിത്തിന്‍റെ നേതൃത്വത്തിലുള്ള പ്രത്യേകസംഘം കസ്റ്റഡിയിൽ എടുത്തത്.
വീട്ടിൽനിന്നും കസ്റ്റഡിയിൽ എടുത്തപ്പോൾ ഇവർ ശ്രീജിത്തിനെ ക്രൂരമായി മർദിച്ചിരുന്നുവെന്ന് ശ്രീജിത്തിന്‍റെ അമ്മ വ്യാഴാഴ്ച പ്രത്യേക അന്വേഷണ സംഘത്തിനു മൊഴി നൽകിയിരുന്നു. ഇതിന്‍റെ അടിസ്ഥാനത്തിലാണ് ഇവരെ കസ്റ്റഡിയിൽ എടുത്തതെന്നാണ് സൂചന. ഇവരെ ചോദ്യം ചെയ്തുവരികയാണ്.
ശ്രീജിത്തിനെ ഇവർ കസ്റ്റഡിയിൽ എടുത്തശേഷം എങ്ങോട്ടാണ് കൊണ്ടുപോയത് തുടങ്ങിയ കാര്യങ്ങളാണ് അന്വേഷണം സംഘം ചോദിച്ചറിയുന്നത്. ഇവർ റൂറൽ എസ്പിയുടെ സ്ക്വാഡിലെ അംഗങ്ങളായിരുന്നു. നേരത്തെ ഇവരെ അന്വേഷണവിധേയമായി സസ്പെൻഡ് ചെയ്തിരുന്നു.
