ഐപിഎലിൽ 4,000 റണ്‍സ് തികയ്ക്കുന്ന അഞ്ചാമത് ബാറ്റ്സ്മാൻ എന്ന നേട്ടത്തിൽ കോൽക്കത്ത നൈറ്റ് റൈഡേഴ്സിന്‍റെ റോബിൻ ഉത്തപ്പ. മുംബൈ ഇന്ത്യൻസിനായി എട്ടാം ഓവർ എറിഞ്ഞ മായങ്ക് മാർക്കണ്ഡെയുടെ അഞ്ചാം പന്ത് സിക്സർ പറത്തി 19 റണ്‍സിൽ എത്തിയപ്പോഴാണ് ഉത്തപ്പ ഈ നേട്ടത്തിലെത്തിയത്. മാർക്കണ്ഡെയുടെ ഗൂന്തി ഡീപ് മിഡ് വിക്കറ്റിനു മുകളിലൂടെ ഉത്തപ്പ ഗാലറിയിൽ എത്തിച്ചു.
തൊട്ടടുത്ത പന്തിലും മാർക്കണ്ഡെയെ ഉത്തപ്പ സിക്സറിനു പറത്തി. നേരിട്ട ഏഴാം പന്തിൽ ഉത്തപ്പ പുറത്താകേണ്ടതായിരുന്നു. നാല് റണ്‍സുമായി ക്രീസിൽനിന്ന ഉത്തപ്പയെ ഹാർദിക് പാണ്ഡ്യയുടെ പന്തിൽ മാർക്കണ്ഡെ വിട്ടുകളഞ്ഞിരുന്നു.
നേരിട്ട് കൈകളിലേക്ക് ലഭിച്ച ക്യാച്ച് നഷ്ടപ്പെടുത്തിയ മാർക്കണ്ഡെയോട് പാണ്ഡ്യ ദേഷ്യംമറച്ചുവച്ചില്ല. വീണുകിട്ടിയ അവസരം മുതലാക്കി ഉത്തപ്പ അർധസെഞ്ചുറി നേടി.
