ബാങ്കോക്ക്: യൂബര്‍ കപ്പ് ബാഡ്മിന്‍റണില്‍നിന്ന് ഇന്ത്യ പുറത്തായി. ഗ്രൂപ്പ് എയില്‍ ജപ്പാനോട് 5-0ന്‍റെ തോല്‍വിയാണ് ഇന്ത്യന്‍ ടീം നേരിട്ടത്. സിംഗിള്‍സില്‍ സൈന നെഹ്‌വാള്‍ നാലു മാച്ച് പോയിന്‍റ് നഷ്ടമാക്കി തോല്‍വിയേറ്റുവാങ്ങി.
പി.വി. സിന്ധു, അശ്വിനി പൊന്നപ്പ എന്നിവരില്ലാതെയാണ് ഇന്ത്യ ടൂര്‍ണമെന്‍റിലെത്തിയത്. ആദ്യ മത്സരത്തില്‍ ഇന്ത്യക്കു തോല്‍വിയായിരുന്നു. സൈന- അകാനെ യാമഗുച്ചി സിംഗിള്‍സില്‍ ഇന്ത്യന്‍ താരത്തിനു തോല്‍വി നേരിട്ടു.
നിര്‍ണായമായ മൂന്നാം ഗെയിമില്‍ സൈന ലോക രണ്ടാം നമ്പർ താരത്തോടു വരുത്തിയ പിഴവുകളാണ് തോല്‍വിക്കിടയാക്കിയത്. നാലു മാച്ച് പോയിന്‍റുകള്‍ നഷ്ടമാക്കിയ സൈന 21-19, 9-21, 22-20ന് തോറ്റു. ഡബിള്‍സില്‍ സം‍യോജിത ഘോര്‍പടെ-പ്രജാക്ത സാവന്ത് സഖ്യം 21-15, 21-6ന് ലോക നാലാം നമ്പര്‍ അയാകാ തകഹാഷി-മിസാകി മറ്റ്‌സുടോമോ സഖ്യത്തോട് തോറ്റു.
രണ്ടാം സിംഗിൾസില്‍ വൈഷ്ണവി റെഡ്ഢി ജാക്കയെ ലോക ചാമ്പ്യന്‍ നൊസോമി ഒകുഹാര 21-10, 21-13ന് പരാജയപ്പെടുത്തി. നാലാം മത്സരത്തില്‍ വൈഷ്ണവി ഭാലേ-മേഘന ജാകംപുഡി സഖ്യവും അവസാന സിംഗിള്‍സില്‍ അരുണ പ്രഭുദേശായിയും തോറ്റു.
