കൊച്ചി: തുടർച്ചയായ ഏഴാം ദിവസവും സംസ്ഥാനത്ത് ഇന്ധന വില കുറഞ്ഞു. പെട്രോളിനു 13 പൈസയും ഡീസലിന് ഒൻപതു പൈസയുമാണു കുറഞ്ഞത്. തിരുവനന്തപുരത്ത് ഒരു ലിറ്റർ പെട്രോളിനു 80.97 രൂപയാണ് ഇന്നത്തെ വില. ഡീസൽ വില ലിറ്ററിനു 73.72 രൂപയും. ഇന്നലെയിതു യഥാക്രമം 81.10 രൂപയും 73.81 രൂപയുമായിരുന്നു. കൊച്ചിയിൽ ഒരു ലിറ്റർ പെട്രോളിന് 79.70 രൂപയും ഡീസൽ വില 72.53 രൂപയുമാണ്.
ഇന്നലെ ഇതു യഥാക്രമം 79.83 രൂപയും 72.62 രൂപയുമായിരുന്നു. ഒരാഴ്ചയ്ക്കിടെ പെട്രോളിനു 60 പൈസയ്ക്കു മുകളിലും ഡീസലിനു 45 പൈസയ്ക്കു മുകളിലുമാണു കുറഞ്ഞത്. രാജ്യാന്തര വിപണിയിൽ എണ്ണവില കുറയുന്നതിന്‍റെ അടിസ്ഥാനത്തിലാണ് ഇന്ധനവിലയിൽ നേരിയ കുറവുണ്ടാകുന്നത്.
