കോതമംഗലം: ബ്ലോക്ക് ഓഫീസിൽ വീട് നിർമാണത്തിന് അപേക്ഷ നൽകാനെത്തിയ വീട്ടമ്മയോട് മോശമായി പെരുമാറിയ ജോയിന്റ് ബിഡിഒ അറസ്റ്റിൽ. കോതമംഗലം മലയിൻകീഴ് ബ്ലോക്ക് ഓഫീസിലെ അസിസ്റ്റന്‍റ് ബിഡിഒ ഊന്നുകൽ പറക്കുടി ഷിബു വർഗീസ്(53)ആണ് അറസ്റ്റിലായത്.
ഇന്നലെ രാവിലെ 11.30ഓടെ ഷിബുവിന്‍റെ ഓഫീസ് കാബിനിലായിരുന്നു സംഭവം. എരമല്ലൂർ സ്വദേശിനിയായ വീട്ടമ്മ ലൈഫ് മിഷൻ പദ്ധതിയിൽ അപേക്ഷ നൽകാൻ എത്തിയതായിരുന്നു. ഭർത്താവുമായി പിരിഞ്ഞ് തനിച്ചാണ് താമസിക്കുന്നതെന്ന് മനസിലാക്കിയ ഷിബു വീട്ടിലെത്തി ഉടൻ വിവരശേഖരണം നടത്താമെന്ന് പറഞ്ഞതായും അശ്ലീല സംഭാഷണം നടത്തി കയറിപ്പിടിച്ച് അപമാനിച്ചതായുമാണ് വീട്ടമ്മ പോലീസിൽ നൽകിയിരിക്കുന്ന മൊഴി.
കുതറിമാറി ഓടി രക്ഷപ്പെട്ട വീട്ടമ്മ ബിഡിഒയുടെയും ബ്ലോക്ക് പഞ്ചായത്ത് പ്രസിഡന്‍റിന്‍റെയും അടുത്തെത്തി വിവരം ധരിപ്പിച്ചു. പിന്നീട് പോലീസ് സ്റ്റേഷനിൽ എത്തി പരാതി നൽകുകയായിരുന്നു. പോലീസ് അറസ്റ്റുചെയ്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
