കരുനാഗപ്പള്ളി: പതിനേഴുകാരിയായ പ്ലസ് ടു വിദ്യാർഥിനി ട്രെയിൻ തട്ടി മരിച്ച സംഭവം കൊലപാതകമോ ആത്മഹത്യാ പ്രേരണയോ ആകാമെന്ന നിഗമനത്തിലേയ്ക്ക് പോലീസ് വിരൽ ചൂണ്ടുന്നു.
ക്ലാപ്പന വരവിള സ്വദേശിനിയെയാണ് ചങ്ങൻകുളങ്ങര റെയിൽവേ ഗേറ്റിന് സമീപം ട്രെയിൻ തട്ടി മരിച്ച നിലയിൽ കണ്ടെത്തിയത്. രാത്രിയോടെ പെൺകുട്ടിയെ കാണതായതിനെ തുടർന്ന് വീട്ടുകാർ അന്വേഷിച്ച് വരികയായിരുന്നു.
ഇതിനിടയിലാണ് കഴിഞ്ഞ 23ന് പുലർച്ചെ ഓച്ചിറ ചങ്ങൻകുളങ്ങരയിലെ റെയിൽവേ ഗേയിറ്റിന് സമീപം പെൺകുട്ടിയുടെ മൃതദേഹം കണ്ടെത്തിയത്. എന്നാൽ മൊബൈൽ ഫോൺ ഉപയോഗിക്കുന്നതിനെ ചൊല്ലി മാതാപിതാക്കളുമായി വഴക്കിട്ട പെൺകുട്ടി രാത്രി 1.30 ഓടെ ഒരു യുവാവിനോടൊപ്പം ബൈക്കിൽ പോകുന്നതിന്റെ ദ്യശൃം സമീപത്തെ വീട്ടിലെ സിസിടിവിയിൽ നിന്നു പോലീസിനു വിവരം ലഭിച്ചു.
പെൺകുട്ടി ഉപയോഗിച്ചിരുന്ന മൊബൈൽ ഫോണിൽ നിന്നും ചില സൂചനകൾ ലഭിച്ചിട്ടുണ്ടെന്നാണ് വിവരം. പോസ്റ്റ്മോർട്ടം റിപ്പോർട്ട് ലഭിച്ചാൽ കൂടുതൽ വിവരങ്ങൾ ലഭ്യമാകുമെന്ന് അന്വേഷണ ഉദ്യോഗസ്ഥർ പറയുന്നു.
