ചൊവ്വ ഗ്രഹത്തില്‍ ആണ് ജനിച്ചതെന്ന അവകാശവാദവുമായി ഒരു റഷ്യന്‍ യുവാവ്. 20 വയസുകാരന്‍ ബോറിസ്‌ക മിപ്രിയാനോവിച്ച് ആണ് തന്റെ ജന്മഗ്രഹം ചൊവ്വയാണെന്നും ഭൂമിയിലെത് പുനര്‍ജന്മമാണെന്നും അവകാശപ്പെടുന്നത്.
ആദ്യം തമാശയായാണ് ഇക്കാര്യം വീട്ടുകാര്‍ കരുതിയത് എങ്കിലും പിന്നീട് ഇവരും വിശ്വസിക്കുകയായിരുന്നു. ജനിച്ച് മാസങ്ങള്‍ക്കുള്ളില്‍ ബോറിസ്‌ക സംസാരിച്ചു തുടങ്ങിയതായി രക്ഷിതാക്കള്‍ അവകാശപ്പെടുന്നു. ഇതുവരെ പഠിച്ചിട്ടില്ലാത്ത വിഷയങ്ങളില്‍, അതും അന്യഗ്രഹ ജീവികളെക്കുറിച്ചുള്ള കാര്യങ്ങള്‍, മറ്റു ഗ്രഹങ്ങളിലെ ജീവിതം ഇതെല്ലാം കുട്ടി ചര്‍ച്ച ചെയ്യാറുണ്ടെന്ന് ബ്രിട്ടീഷ് ദിനപത്രം ഡെയ്‌ലി മെയ്‌ലിന് നല്‍കിയ അഭിമുഖത്തില്‍ രക്ഷിതാക്കള്‍ പറഞ്ഞു.
ചൊവ്വയില്‍വച്ച് ഒരു ന്യൂക്ലിയര്‍ ദുരന്തത്തില്‍പ്പെട്ടെന്നാണ് ബോറിസ്‌കയുടെ അവകാശവാദം. ചൊവ്വയില്‍ ഏഴടി ഉയരമുള്ള ജീവികളുണ്ടെന്നും ഇവര്‍ മണ്ണിനടിയിലാണെന്നും കാര്‍ബണ്‍ ഡയോക്‌സൈഡ് ആണ് ശ്വസിക്കുന്നതെന്നും ബോറിസ്‌ക പറഞ്ഞതായി ഡെയ്‌ലി മെയില്‍ റിപ്പോര്‍ട്ട് ചെയ്തു.
