താമരശേരി (കോഴിക്കോട് ): താമരശേരിയില്‍ രാത്രി ദമ്പതികളെ വീട്ടില്‍ നിന്നു ഗുണ്ടാസംഘം തട്ടിക്കൊണ്ടുപോയി ഭാര്യയെ വഴിയില്‍ ഇറക്കിവിട്ടു.സംഭവത്തിൽ രണ്ട് പേരെ പോലീസ് കസ്റ്റഡിയിലെടുത്തു.
ഇവരെ വിശദമായി ചോദ്യം ചെയ്തുവരികയാണ്.ഇന്നലെ രാത്രി ഒമ്പതരയോടെയാണ് സിനിമാസ്‌റ്റൈല്‍സംഭവം അരങ്ങേറിയത്.
പരപ്പൻപൊയിൽ കുറുന്തോട്ടി കണ്ടിയില്‍ ഷാഫി എന്ന വ്യവസായിയെയും ഭാര്യ സെനിയയെയുമാണ് വീട്ടിന് മുന്നിൽ നിന്ന് പിടിച്ചുകൊണ്ടുപോയത്. തുട‍ർന്ന് ഭാര്യയെ വഴിയിലുപേക്ഷിച്ചു.
പിടിവലിക്കിടെ സെനിയക്ക് പരിക്കേറ്റു.അക്രമികൾ മുഖം മറച്ചിരുന്നുവെന്നാണ് സെനിയ നൽകിയിരിക്കുന്ന മൊഴി. വിദേശത്ത് ബിസിനസുകാരനായിരുന്നു ഷാഫി.
പണമിടപാടുമായി ബന്ധപ്പെട്ട തർക്കമാണ് ഷാഫിയെ തട്ടിക്കൊണ്ടുപോകാൻ കാരണമെന്നാണ് വിവരം. കാറിലെത്തിയ നാലംഗ സംഘമാണ് ഇരുവരെയും തട്ടിക്കൊണ്ടുപോയത്.
തന്നെ ചിലർ ഭീഷണിപ്പെടുത്തുന്നതായി കാണിച്ച് താമരശേരി പോലീസിൽ നേരത്തേ ഷാഫി പരാതി നൽകിയിരുന്നു.
ഇതിന്‍റെ അടിസ്ഥാനത്തിൽ കൊടുവള്ളി സ്വദേശിയായ സാലി എന്നയാൾക്കെതിരെ കേസെടുക്കുകയും ചെയ്തിരുന്നു.
ഇയാൾ ഇപ്പോൾ വിദേശത്താണ്. തട്ടിക്കൊണ്ടുപോകാൻ സംഭവത്തിന് ഇയാളുമായി ബന്ധമുണ്ടോയെന്ന് പോലീസ് അന്വേഷിക്കുകയാണ്.
