ഇരിട്ടി(കണ്ണൂർ): ആറളം ഫാമില്‍ ആദിവാസി യുവാവിനെ കാട്ടാന അക്രമിച്ചു. ഏഴാം ബ്ലോക്കിലെ അനീഷിനെ (30)യാണ് ഇന്നലെ രാത്രി കാട്ടാന ആക്രമിച്ചത്.സ്‌കൂട്ടിയില്‍ വീട്ടിലേക്ക് പോകുമ്പോള്‍ കാട്ടാന തട്ടിയിടുകയും നിലത്തുവീണ അനീഷിനെ ചവിട്ടുകയുമായിരുന്നത്രെ.
കാലിന് സാരമായി പരിക്കേറ്റ അനീഷിനെ തലശേരി ജനറല്‍ ആശുപത്രിയില്‍ പ്രവേശിപ്പിച്ചു. എന്നാല്‍, സംഭവം അറിഞ്ഞയുടന്‍ വനപാലകര്‍ സ്ഥലത്തെത്തി പരിശോധന നടത്തിയെങ്കിലും ആനയെ കണ്ടെത്താനായില്ല. ഇന്നും മേഖലയില്‍ പരിശോധന നടത്തുന്നുണ്ട്.
ആറളം ഫാം ജനവാസ മേഖലയില്‍കാട്ടാനയുടെ വിളയാട്ടം വ്യാപകമാണ്. കഴിഞ്ഞദിവസം ഫാം നഴ്‌സറി പരിസരത്ത് കാട്ടാന ഇറങ്ങി വ്യാപകമായി തെങ്ങ് ഉൾപ്പെടെയുള്ള കാര്‍ഷികവിളകള്‍ നശിപ്പിച്ചിരുന്നു. എന്നാല്‍, ഫാമിലും പരിസര പ്രദേശങ്ങളായ ജനവാസമേഖലയിലും കാട്ടാന വിളയാട്ടം പതിവായിട്ടും വനപാലകര്‍ നടപടിയെടുക്കുന്നില്ലെന്ന ആരോപണം ശക്തമാണ്.
