കുണ്ടറ: നെടുന്പനയിൽ ദളിത് വിദ്യാർഥിയുടെ ദുരൂഹമരണം സംബന്ധിച്ച് സമഗ്രാന്വേഷണംവേണമെന്ന് കുടുംബാംഗങ്ങൾ ആവശ്യപ്പെട്ടു. പഴങ്ങാലം കുന്നുവിള വീട്ടിൽ വസന്തകുമാരിയുടെയും കെ. രവീന്ദ്രന്‍റെയും മകൻ അഭിലാഷ് (19) നെയാണ് ദുരൂഹസാഹചര്യത്തിൽ മരിച്ച നിലയിൽ കണ്ടെത്തിയത്.
എൻജിനീ‍യറിംഗ് ഒന്നാം വർഷ വിദ്യാർഥിയായിരുന്ന അഭിലാഷിനെ കഴിഞ്ഞ 24ന് വൈകുന്നേരം കാണാതാവുകയായിരുന്നു. വീട്ടുകാർ ഇത് സംബന്ധിച്ച് കുണ്ടറ പോലീസിൽ പരാതി നൽകിയെങ്കിലും 25ന് രാവിലെ പത്തോടെ വീടിന് ഒരു കിലോമീറ്റർ അകലെയുള്ള വയൽക്കരയിലെ മരക്കൊന്പിൽ തൂങ്ങിമരിച്ച നിലയിൽ കണ്ടെത്തുകയായിരുന്നു.
മൃതദേഹത്തിന്‍റെ കാലുകൾ തറയിൽ മുട്ടിയ നിലയിലായിരുന്നുവെന്ന് പറയപ്പെടുന്നു. പോക്കറ്റിൽ നിന്നും ഒരു പെൺകുട്ടിയുടെ ഫോട്ടോയും കത്തും കണ്ടെടുത്തു.
പോലീസ് വേണ്ടവിധത്തിൽ സംഭവത്തെക്കുറിച്ച് അന്വേഷിക്കുന്നില്ലെന്നാണ് നാട്ടുകാരുടെയും കുടുംബാംഗങ്ങളുടെയും പരാതി. സംഭവത്തിൽ സമഗ്രാന്വേഷണം നടത്തണമെന്നാവശ്യപ്പെട്ട് രവീന്ദ്രൻ മുഖ്യമന്ത്രിക്ക് പരാതി നൽകും
