പാലാ: നെടുന്പാശേരി വിമാനത്താവളത്തിലേക്ക് പോകുകയായിരുന്ന യുവ ഡോക്‌ടറും മാതാപിതാക്കളും സഞ്ചരിച്ചിരുന്ന കാർ ലോറിയുമായി കൂട്ടിയിടിച്ച് യുവ ഡോക്‌ടർ മരിച്ചു. പാലാ പാലക്കാട്ടുമല തെരുവത്ത് ഡോ. ആകാശ് തോമസ് (26) ആണ് മരിച്ചത്. ഇന്നു പുലർച്ചെ നെടുന്പാശേരിക്കു സമീപം പുല്ലുവഴിയിലാണ് അപകടമുണ്ടായത്.
ജർമനിയിൽ ഉപരിപഠനം നടത്തുന്ന ഡോ. ആകാശ് ഓസ്ട്രേലിയയ്ക്കു പോകുന്നതിനായാണ് നെടുന്പാശേരി വിമാനത്താവളത്തിലേക്കു യാത്രതിരിച്ചത്. ഡോക്‌ടറുടെ രണ്ടു സഹോദരങ്ങൾ ഓസ്ട്രേലിയയിലുണ്ട്. ഇവരെ സന്ദർശിച്ചതിനുശേഷം ജർമനിക്കു പോകുവാനായിരുന്നു തീരുമാനം. പിതാവ് ടി.ടി. തോമസ് (ജോയി) ആണ് കാർ ഓടിച്ചിരുന്നത്. പരിക്കേറ്റ തോമസിനെയും ഭാര്യ സൂസമ്മയേയും (ഉഷ) ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചു.
പിതാവ് ടി.ടി. തോമസ് റിട്ടയേഡ് ഹെഡ്മാസ്റ്ററാണ്. മാതാവ് സൂസമ്മ തോമസ് റിട്ടയേഡ് എസ്ബിടി അസി. മാനേജരാണ്.
സഹോദരങ്ങളായ ആശിഷ് തോമസ്, ആനന്ദ് തോമസ് എന്നിവർ വർഷങ്ങളായി ഓസ്ട്രേലിയയിലാണു താമസം. ഡോ. ആകാശ് തോമസ് ഒരു വർഷത്തോളം പാലാ മരിയൻ മെഡിക്കൽ സെന്‍ററിൽ സേവനമനുഷ്ഠിച്ചിട്ടുണ്ട്. പാലാ രൂപതാംഗവും പൂഞ്ഞാർ ഫൊറോന പള്ളി വികാരിയുമായ ഫാ. അഗസ്റ്റിൻ തെരുവത്ത് ആകാശിന്‍റെ പിതൃസഹോദരനാണ്.
