തൃപ്പൂണിത്തുറ: അലക്ഷ്യമായി യുടേണ്‍ തിരിഞ്ഞ ബൈക്കിലിടിച്ച് റോഡിൽ വീണ സ്കൂട്ടർ യാത്രികയ്ക്ക് ദാരുണാന്ത്യം. ഉദയംപേരൂർ നടക്കാവ് എസ്എൻഡിപി സ്കൂളിനു സമീപം സിദ്ധാർത്ഥം വീട്ടിൽ സിബിന്‍റെ ഭാര്യ കാവ്യ (26) ആണ് മരിച്ചത്.
എസ്എൻ ജംഗ്ഷനടുത്തുള്ള അലയൻസ് ജംഗ്ഷനിൽ യുടേണിനടുത്ത് രാവിലെ 8.45ഓടെയാണ് അപകടം. യുവതിയുടെ പിന്നിൽ വന്ന ബൈക്ക് യാത്രക്കാരൻ ഓവർ ടേക്ക് ചെയ്തു കയറിയ ശേഷം അലക്ഷ്യമായി തിരിയുകയായിരുന്നു.
ഈ ബൈക്കിലിടിച്ച് സ്കൂട്ടറിൽ നിന്ന് റോഡിലേക്ക് തെറിച്ചുവീണ യുവതി എഴുന്നേൽക്കാൻ ശ്രമിക്കവേ പിന്നാലെവന്ന ബസ് യുവതിയുടെ തലയിലിടിക്കുകയായിരുന്നു.
ഗുരുതര പരിക്കേറ്റ യുവതിയെ ബസ് ജീവനക്കാർ വൈറ്റിലയിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്നു രാവിലെ 11ന് തൃപ്പൂണിത്തുറ ശ്മശാനത്തിൽ.
കടവന്ത്രയിലെ സിനർജി ഓഷ്യാനിക് സർവീസ് സെന്‍ററിലെ സീനിയർ എക്സിക്യൂട്ടിവാണ് കാവ്യ. ഏക മകൻ: സിദ്ധാർത്ഥ്.
അലക്ഷ്യമായി ബൈക്ക് ഓടിച്ചയാൾ അറസ്റ്റിൽ
തൃപ്പൂണിത്തുറ: അലക്ഷ്യമായി യൂടേണ്‍ തിരിഞ്ഞ് സ്കൂട്ടർ യാത്രക്കാരി ബസിടിച്ചു മരിച്ച കേസിൽ ബൈക്കോടിച്ച ആന്പല്ലൂർ കൊല്ലംപറന്പ് വീട്ടിൽ വിഷ്ണു (29), ബസ് ഡ്രൈവർ കാഞ്ഞിരമറ്റം മുതലക്കുഴിയിൽ സുജിത് (38) എന്നിവരെ ഹിൽപാലസ് പോലീസ് അറസ്റ്റു ചെയ്തു.
വിഷ്ണു ഓടിച്ച ബൈക്കിടിച്ച് 2020 ജൂണ്‍ 12ന് കണ്ടനാട് ഉദയംപേരൂർ കവലയിൽ സൈക്കിൾ യാത്രികൻ മരിച്ചിരുന്നു. ഈ സംഭവത്തിൽ ഇയാളുടെ ലൈസൻസ് മൂന്നു മാസത്തേയ്ക്ക് സസ്പെൻഡ് ചെയ്തിരുന്നു.
