പന്തളം: ലോറിക്ക് പിന്നിൽ ബൈക്കിടിച്ചുണ്ടായ അപകടത്തിൽ ബി-കോം വിദ്യാർത്ഥി മരിച്ചു. പന്തളം പറന്തൽ വല്ലാറ്റൂർ കോയിപ്പള്ളി തെക്കേതിൽ സേതുകുമാറിന്‍റെ മകൻ വിഷ്ണുവാണ് (19) മരിച്ചത്. ഇന്ന് പുലർച്ചെ 3.45ഓടെ പന്തളം ചിത്രാ ആശുപത്രിക്ക് സമീപം എംസി റോഡിലായിരുന്നു അപകടം.
പന്തളം കടയ്ക്കാട് ചന്തയിൽ ഫിഷ് കമ്മീഷൻ സ്ഥാപനത്തിൽ അക്കൗണ്ടന്‍റായി ജോലി ചെയ്തിരുന്ന വിഷ്ണു, അവിടേക്ക് വരികയായിരുന്നു. പന്തളം ഭാഗത്തേക്ക് വന്ന ലോറിക്ക് പിന്നിലിടിച്ചായിരുന്നു അപകടം. ഗുരുതരമായി പരിക്കേറ്റ വിഷ്ണു സംഭവസ്ഥലത്ത് തന്നെ മരിച്ചു. അടൂരിലെ സ്വകാര്യ സ്ഥാപനത്തിൽ ബി-കോം വിദ്യാർഥിയായിരുന്നു. സംസ്കാരം നാളെ 10ന് വീട്ടുവളപ്പിൽ. രോഹിണിയാണ് മാതാവ്. സഹോദരൻ ജിഷ്ണു.
