ഹരിപ്പാട്: ദേശീയപാതയിൽ നങ്ങ്യാർകുളങ്ങരയിൽ നിയന്ത്രണം വിട്ട ബസ് താഴ്ചയിലേക്ക് മറിഞ്ഞു. കൊല്ലം കുരീപ്പുഴ സ്വദേശികൾ സഞ്ചരിച്ചിരുന്ന ടൂറിസ്റ്റ് ബസാണ് അപകടത്തിൽപ്പെട്ടത്. ഇന്നലെ രാത്രി 11ഓടെയായിരുന്നു അപകടം. ബസ് ലോറിയെ മറികടക്കുന്നതിനിടയിൽ എതിരേ വന്ന വാഹനത്തിൽ ഇടിക്കാതിരിക്കാൻ പെട്ടെന്ന് വെട്ടിച്ചപ്പോൾ നിയന്ത്രണം തെറ്റി റോഡിന്റെ ഇടതു വശത്തുള്ള താഴ്ചയിലേക്ക് മറിയുകയായിരുന്നു. ബസിൽ 38 ഓളം യാത്രക്കാരുണ്ടായിരുന്നു.
പാലക്കാടുനിന്നും കൊല്ലത്തേക്ക് മടങ്ങുകയായിരുന്ന സംഘം സഞ്ചരിച്ചിരുന്ന ബസാണ് അപകടത്തിൽപ്പെട്ടത്. 28പേർക്ക് പരിക്കേറ്റു. സാരമായ പരിക്കേറ്റ ആറുപേരെ ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ബാക്കിയുള്ളവരെ ഹരിപ്പാട് ഗവ.ആശുപത്രിയിൽ പ്രഥമ ശുശ്രൂഷ നല്കിയ ശേഷം വിട്ടയച്ചു.
കൊല്ലം കുരീപ്പുഴ സ്വദേശികളായ അഖിൽ നവാസ്, സഫിയത്ത്, സഫീന, സുഹറാബീവി, ജമീലാബീവി, ഡ്രൈവർ അനൂപ് എന്നിവരാണ് മെഡിക്കൽ കോളജ് ആശുപത്രിയിലുള്ളത്. കരീലകുളങ്ങര പോലീസിന്റെയും, ഹൈവേ പോലീസിന്റെയും നേതൃത്വത്തിലാണ് പരിക്കേറ്റവരെ ആശുപത്രിയിലെത്തിച്ചത്.
