ചിറ്റൂർ: കൊഴിഞ്ഞാന്പാറയിൽ കെഎസ്ആർടിസിയും ടിപ്പറും കൂട്ടിയിടിച്ച് ഒരാൾ മരിച്ചു. ടിപ്പർ ഡ്രൈവർ പൊൽപ്പുള്ളി അത്തിക്കോട് കല്ലങ്കാട് രാജന്‍റെ മകൻ സജീവനാണ് (32) മരിച്ചത്. ഗുരുതരമായി പരിക്കേറ്റ കെഎസ്ആർടിസി ഡ്രൈവർ ബാബുവിനെ തൃശൂർ മെഡിക്കൽ കോളജിൽ പ്രവേശിപ്പിച്ചു. ബസിലെ യാത്രക്കാരായ പത്തോളംപേരെ സ്വകാര്യ ആശുപത്രിയിൽ പ്രവേശിപ്പിച്ചു.
ഇന്നുരാവിലെ 7.30ന് നാട്ടുകൽ പാചകവാതക വിതരണ ഡിപ്പോയ്ക്കു സമീപത്തായിരുന്നു അപകടം. കൊഴിഞ്ഞാന്പാറയിൽനിന്നും കോട്ടയത്തേക്കു പോകുകയായിരുന്നു കെഎസ്ആർടിസി ബസ്. പരിക്കേറ്റ ബാബുവിന്‍റെ കാലിന്‍റെ എല്ലുപൊട്ടി. ഇരുവാഹനങ്ങളും കൂട്ടിയിടിച്ചതോടെ കാബിനിൽ കുടുങ്ങിയ ടിപ്പർ ഡ്രൈവർ സജീവൻ സ്ഥലത്തുതന്നെ മരണമടഞ്ഞു.
ചിറ്റൂർ ഫയർഫോഴ്സ് എത്തിയാണ് വാഹനത്തിന്‍റെ മുൻഭാഗം വെട്ടിപ്പൊളിച്ച് ഇയാളെ പുറത്തെടുത്തത്.
കൊഴിഞ്ഞാന്പാറ പോലീസ് സ്ഥലത്തെത്തി രക്ഷാപ്രവർത്തനം നടത്തി. അപകടത്തെ തുടർന്ന് കൊഴിഞ്ഞാന്പാറ-നല്ലേപ്പിള്ളി റോഡിൽ ഒരുമണിക്കൂറോളം ഗതാഗതം തടസപ്പെട്ടു.
