കളമശേരി: ഏലൂർ പാതാളത്ത് ടിപ്പർ ലോറിയും സ്വകാര്യ ബസും കൂട്ടിയിടിച്ചുണ്ടായ അപകടത്തിൽ സ്ത്രീകളും കുട്ടികളുമടക്കം ഇരുപത്തിയഞ്ചോളം പേർക്ക് പരിക്ക്. ഇന്നു രാവിലെ 8.45 ഓടെ പാതാളം ഗീത ബസ് സ്റ്റോപ്പിലായിരുന്നു അപകടം. ബസ് യാത്രികർക്കാണു പരിക്കേറ്റത്.
ഇവരെ പാതാളത്തെ ഇഎസ്ഐ ജില്ലാ ആശുപത്രിയിലും മഞ്ഞുമ്മലിലെ സ്വകാര്യ ആശുപത്രിയിലും പ്രവേശിപ്പിച്ചു. ആരുടെയും നില ഗുരുതരമല്ലെന്ന് അധികൃതർ പറഞ്ഞു.
പാതാളത്തുനിന്നും കളമശേരി വഴി എറണാകുളം തേവരയ്ക്കു സർവീസ് നടത്തുന്ന ബസാണ് അപകടത്തിൽപ്പെട്ടത്. എതിരേവന്ന ടിപ്പർ ലോറിയുമായി ബസ് കൂട്ടിയിടിക്കുകയായിരുന്നുവെന്നു ഏലൂർ പോലീസ് പറഞ്ഞു.
