കൊച്ചി: കണ്ടെയ്നർ ലോറിയിടിച്ച് ബുള്ളറ്റ് യാത്രികനായ യുവാവ് മരിച്ചു. കുന്പളം ജയന്തി റോഡ് കിഴക്കേചക്കനാട്ട് വീട്ടിൽ ശിവാനന്ദന്‍റെ മകൻ സി.എസ്. ശ്രീഹരി (20) ആണ് മരിച്ചത്. സഹയാത്രികനായ കുണ്ടന്നൂർ സ്വദേശി കുടുമാന്തറ വീട്ടിൽ പരമേശ്വരൻ (42) പരിക്കേറ്റു. ഇന്നു രാവിലെ 8.45ന് കുണ്ടന്നൂർ പാലത്തിൽവച്ചാണു അപകടമുണ്ടായതെന്നു ഈസ്റ്റ് ട്രാഫിക് പോലീസ് വ്യക്തമാക്കി. ശ്രീഹരി ഓടിച്ചിരുന്ന ബുള്ളറ്റിൽ കണ്ടെയ്നർ ലോറി ഇടിക്കുകയായിരുന്നുവെന്നു അധികൃതർ പറഞ്ഞു.
അപകടത്തെത്തുടർന്നു റോഡിലേക്കു വീണ ഇരുവരെയും ഉടൻ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ശ്രീഹരിയെ രക്ഷിക്കാനായില്ല. പോലീസ് മേൽനടപടികൾ സ്വീകരിച്ചുവരികയാണ്. മേളം കഴിഞ്ഞു വരവേയാണു ഇരുവരും അപകടത്തിൽപ്പെട്ടതെന്നാണു പോലീസിന്റെ പ്രാഥമിക നിഗമനം.
