പാലക്കാട്: ദരിദ്രർ, ദളിതർ, സ്ത്രീകൾ, കുട്ടികൾ, മുതിർന്ന പൗരൻമാർ, അംഗപരിമിതർ, ആദിവാസികൾ, ഭിന്നലിംഗ വിഭാഗക്കാരെ സമൂഹത്തിന്‍റെ മുഖ്യധാരയിലേക്ക് കൈപിടിച്ചുയർത്താനുളള സർക്കാർ പദ്ധതികൾ അർഹരായവരിൽ എത്തുന്നുണ്ടോ എന്നത് വിലയിരുത്തി മാറ്റങ്ങൾക്കുളള നിർദ്ദേശങ്ങൾ പ്രാവർത്തികമാക്കുകയുമാണ് ഭരണപരിഷ്കാര കമ്മീഷൻ ചെയ്യുന്നതെന്ന് കമ്മീഷൻ ചെയർമാൻ വി.എസ് അച്യുതാനന്ദൻ പറഞ്ഞു.
പാലക്കാട് നഗരസഭ ടൗണ്‍ഹാളിൽ ഭരണപരിഷ്കാര കമീഷൻ, ഭിന്നശേഷിക്കാർ, മാനസിക വെല്ലുവിളി നേരിടുന്ന വിഭാഗങ്ങളുടെ ക്ഷേമം സംബന്ധിച്ച വിഷയങ്ങളിൽ നടത്തിയ പബ്ലിക് ഹിയറിങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സർക്കാർ നടപ്പാക്കുന്ന ക്ഷേമ പദ്ധതികൾ അതിന്‍റെ ഗുണഭോക്താക്കളിലേക്ക് എത്രമാത്രം എത്തുന്നുണ്ട്, എത്തുന്നില്ലെങ്കിൽ ചോർച്ച സംഭവിക്കുന്നത് എവിടെ ഒപ്പം തന്നെ ഇനി എന്തെല്ലാം ക്ഷേമപദ്ധതികളാണ് ആവശ്യമായിട്ടുളളത് എന്ന പരിശോധനയും കമീഷൻ നടത്തുന്നുണ്ട്.
ആദ്യഘട്ടത്തിൽ സ്ത്രീകൾ വയോജനങ്ങൾ, ഭിന്നശേഷിക്കാർ, മാനസിക വൈകല്യമുളളവർ, കുട്ടികൾ, ഇതര സംസ്ഥാന തൊഴിലാളികൾ എന്നീ ആറ് വിഭാഗങ്ങളെ തെരഞ്ഞെടുത്തിട്ടുണ്ട്. ഈ വിഭാഗങ്ങൾക്ക് പറയാനുളളത് പറയാനും, അത് രേഖപ്പെടുത്താനും വേണ്ടിയാണ് ഇത്തരം പൊതുചർച്ചകൾ നടത്തുന്നതെന്നും കമീഷൻ ചെയർമാൻ പറഞ്ഞു.
മാനസിക ശാരീരിക വെല്ലുവിളി നേരിടുന്നവരുടെ പ്രശ്നങ്ങൾ പരിഹരിക്കുന്നതിനായി തദ്ദേശ സ്വയംഭരണ സ്ഥാപനങ്ങൾ , പ്രത്യേക ഗ്രാമസഭ ചേരണമെന്ന സർക്കാർ നിർദ്ദേശം എത്രമാത്രം പാലിക്കപ്പെടുന്നുണ്ടന്നും അതിലൂടെ എത്ര മാത്രം ക്ഷേമ പ്രവർത്തനങ്ങൾ നടക്കുന്നുണ്ടെന്നും പരിശോധിക്കേണ്ടതുണ്ടെന്ന് അദ്ദേഹം പറഞ്ഞു.
2011 ലെ സെൻസസ് കണക്കുകൾ അനുസരിച്ച് ജനസംഖ്യയുടെ രണ്ടേകാൽ ശതമാനം പേരാണ് ഭിന്നശേഷിക്കാരായി നിലവിലുളളത്. ഇവരിൽ ഭിന്നശേഷിക്കാരുടെ അവകാശങ്ങളെക്കുറിച്ച് ബോധ്യമില്ലാത്തവരുണ്ടെന്നും ഉദ്ഘാടന പ്രസംഗത്തിൽ കമ്മീഷൻ ചെയർമാൻ ചൂണ്ടിക്കാട്ടി.
