ആലപ്പുഴ: ദേശീയപാതയിൽ കലവൂർ കൃപാസനത്തിനു വടക്കുഭാഗത്തായി സൂപ്പർഫാസ്റ്റും ടൊയോറ്റ ഫോർച്യൂണറും തമ്മിൽ ഇടിച്ച് പത്തു പേർക്ക് പരിക്ക്. പരിക്കേറ്റ നസീറ(28), നസീമ(38), സൈനുദ്ദീൻ(45), ഫാത്തിമ(20), ഐഷ(12), രാധമ്മ(58), ഉത്തമൻ(50), കുഞ്ഞുമോൻ(60), ഗുരുപ്രസാദ്(38) എന്നിവരെ ജനറൽ ആശുപത്രിയിൽ പ്രവേശിപ്പിച്ചു.
ഗുരുതര പരിക്കുള്ള നസീറ, നസീമ, സൈനുദ്ദീൻ, ഫാത്തിമ, ഐഷ എന്നിവരെ വിദഗ്ധ ചികിത്സയ്ക്കായി വണ്ടാനം മെഡിക്കൽ കോളജിലേക്കു മാറ്റി. ഇടിയുടെ ആഘാതത്തിൽ ഫോർച്യൂണർ തലകീഴായി മറിഞ്ഞു. ഇന്നുരാവിലെ ഒന്പതുമണിയോടെയായിരുന്നു അപകടം.
എറണാകുളം ഭാഗത്തേക്കു പോകുകയായിരുന്ന സൂപ്പർ ഫാസ്റ്റും എതിരെ വരികയായിരുന്ന മലപ്പുറം രജിസ്ട്രേഷനിലുള്ള ഫോർച്യൂണറും തമ്മിലിടിക്കുകയായിരുന്നു. മറ്റൊരു വാഹനത്തെ മറികടക്കാൻ ശ്രമിക്കുന്നതിനിടെയാണ് അപകടമുണ്ടായതെന്നും പറയുന്നു. അപകടത്തെ തുടർന്ന് ദേശീയപാതയിൽ ഗതാഗതവും സ്തംഭിച്ചു. പോലീസും ഫയർഫോഴ്സും സംഭവസ്ഥലത്തെത്തിയിരുന്നു.
