വിനയന്‍ സംവിധാനം ചെയ്ത ആകാശഗംഗ മലയാളത്തിലെ എക്കാലത്തെയും മികച്ച ഹൊറര്‍ ചിത്രങ്ങളിലൊന്നാണ്. ഇപ്പോള്‍ ചിത്രത്തിന്റെ രണ്ടാം ഭാഗം പുറത്തിറങ്ങിയിരിക്കുകയാണ്. ഈ അവസരത്തില്‍ മനസ്സു തുറക്കുകയാണ് ആകാശഗംഗയിലെ നായകന്‍ റിയാസ്. നടന്‍ സ്ഫടികം ജോര്‍ജ് വഴിയാണ് താന്‍ വിനയനെ പരിചയപ്പെടുന്നതെന്നും ഈ സമയത്ത് ഒരു നായകനെ അന്വേഷിച്ച് നടക്കുകയായിരുന്നു അദ്ദേഹമെന്നും റിയാസ് പറയുന്നു. ആകാശഗംഗ വന്‍ഹിറ്റായിരുന്നെങ്കിലും ആ വിജയത്താലുണ്ടായ പ്രശസ്തി ഉപയോഗിക്കാന്‍ തനിക്കായില്ലയെന്ന് റിയാസ് പറയുന്നു.
‘ആകാശഗംഗ’യ്ക്ക് ശേഷം ‘സംഭവാമി യുഗേ യുഗേ’ എന്ന ചിത്രത്തില്‍ നായകനായും മറ്റു ചില ചിത്രങ്ങളില്‍ ചെറിയ വേഷങ്ങളിലും അഭിനയിച്ചെങ്കിലും നല്ല കഥാപാത്രങ്ങളോ കാര്യമായ വിജയങ്ങളോ ലഭിച്ചില്ല. അതോടെ ഞാന്‍ പതിയെപ്പതിയെ സിനിമയില്‍ നിന്ന് അകന്നു തുടങ്ങി. ബിസിനസിലും കുടുംബജീവിതത്തിലും ശ്രദ്ധേ കേന്ദ്രീകരിച്ചു.’ റിയാസ് പറയുന്നു.
മലയാളത്തിലെ പ്രിയഗായിക ശബ്‌നത്തെയാണ് റിയാസ് ജീവിത പങ്കാളിയാക്കിയത്. ആകാശ ഗംഗ എന്ന ചിത്രത്തിലൂടെ മലയാളത്തിലേക്ക് എത്തുകയും പിന്നീട് സിനിമയില്‍ നിന്ന് അകലുകയും ചെയ്ത റിയാസ് 20 വര്‍ഷങ്ങള്‍ക്കു ശേഷം ആകാശഗംഗ-2ലൂടെ മലയാള സിനിമയിലേക്ക് തിരികെയെത്തുകയാണ്. ഒരു മാധ്യമത്തിനു നല്‍കിയ അഭിമുഖത്തിലായിരുന്നു റിയാസിന്റെ വെളിപ്പെടുത്തല്‍.
