മലയാള സിനിമയിലെ നിറസാന്നിധ്യമായിരുന്ന നടി കല്പന വിടവാങ്ങിയിട്ട് ഇന്ന് 8 വർഷം. 2016 ജനുവരി 25ന് പുലർച്ചെയാണ് മലയാളികളെ ഞെട്ടിച്ചുകൊണ്ട് കല്പനയുടെ മരണവാർത്ത പുറത്തുവന്നത്. ഷൂട്ടിംഗുമായി ബന്ധപ്പെട്ട് ഹൈദരാബാദിൽ താമസിക്കുകയായിരുന്ന കല്പനയെ രാവിലെ ഹോട്ടലിൽ ബോധരഹിതയായി കണ്ടെത്തുകയായിരുന്നു. ഹൃദയാഘാതമായിരുന്നു താരത്തിന്‍റെ മരണകാരണം.
മുന്നൂറിലേറെ സിനിമകളിൽ അഭിനയിച്ച കല്പനയ്ക്ക് ‘തനിച്ചല്ല ഞാൻ’ എന്ന സിനിമയിലെ പ്രകടനത്തിന് മികച്ച സഹനടിക്കുള്ള ദേശീയ പുരസ്കാരം ലഭിച്ചിട്ടുണ്ട്. കല്പനയുടെ ഹാസ്യകഥാപാത്രങ്ങൾ മലയാളികൾക്ക് ഒരിക്കലും മറക്കാൻ കഴിയുന്നതല്ല.
1965 ഒക്ടോബർ അഞ്ചിന് ജനിച്ച കല്പന സിനിമയിൽ ബാലതാരമായാണ് എത്തിയത്. ഹാസ്യം മാത്രമല്ല മികച്ച സ്വഭാവ നടിയായും വെള്ളിത്തിരയിൽ താരം നിറഞ്ഞുനിന്നു. മാർട്ടിൻ പ്രക്കാട്ട് ഒരുക്കിയ ചാർലിയാണ് കല്പനയുടെ അവസാന ചിത്രം.
നാടകപ്രർത്തകരായ വി.പി. നായരും വിജയലക്ഷ്മിയുമാണ് കല്പനയുടെ മാതാപിതാക്കൾ. പ്രമുഖ നടികളായ ഉർവശി, കലാരഞ്ജിനി എന്നിവർ സഹോദരിമാരാണ്. കമൽ റോയ്, പ്രിൻസ് എന്നിവരാണ് സഹോദരന്മാർ. 1983ൽ ചലച്ചിത്ര സംവിധായകനായ അനിൽകുമാറിനെ കല്പന വിവാഹം കഴിച്ചു. തുടർന്ന് 2012 ൽ ഇരുവരും വിവാഹ മോചിതരാവുകയും ചെയ്തു.
