ടൊറന്‍റോ: കാനഡയിലെ ബ്രിട്ടീഷ് കൊളംബിയ പ്രവിശ്യയിൽ ഇരട്ട എൻജിൻ ചെറുവിമാനം തകർന്നുവീണ് ഇന്ത്യയിൽനിന്നുള്ള രണ്ട് ട്രെയിനി പൈലറ്റുമാർ ഉൾപ്പെടെ മൂന്നു പേർ മരിച്ചു.
മുംബൈ സ്വദേശികളായ അഭയ് ഗദ്രു(25), യാഷ് രാമുഗദെ(25) എന്നിവരാണു മരിച്ച ഇന്ത്യക്കാർ. പൈപ്പർ പിഎ-34 സെനെക്ക വിമാനമാണ് വാൻകൂവറിൽനിന്ന് 100 കിലോമീറ്റർ അകലെ ചില്ലിവാക് സിറ്റിക്കു സമീപം തകർന്നുവീണത്.
വെള്ളിയാഴ്ചയായിരുന്നു സംഭവം. മൂന്നു വർഷംമുന്പാണ് ഗദ്രു പൈലറ്റ് പരിശീലനത്തിനായി കാനഡയിലെത്തിയത്. നവംബറിൽ ബിരുദ പഠനം പൂർത്തിയാകേണ്ടതാണ്.
വിമാനം നിയന്ത്രിക്കുന്നതു പരിശീലിപ്പിക്കുന്ന സ്കൈക്വസ്റ്റ് ഏവിയേഷന്‍റേതാണു ചെറുവിമാനം. അപകടകാരണം വ്യക്തമല്ലെങ്കിലും വിമാനം പൂർണമായും തകർന്നിട്ടുണ്ട്.
