കൊച്ചി: ഇന്‍സ്റ്റഗ്രാമില്‍ പോസ്റ്റു ചെയ്യാനുള്ള റീല്‍സ് ചിത്രീകരണത്തിനിടെ അബദ്ധവശാല്‍ അഭിഭാഷകന് എയര്‍ഗണ്ണില്‍നിന്നു വെടിയേറ്റു.
സംഭവവുമായി ബന്ധപ്പെട്ട് രണ്ട് യുവാക്കളെ പാലാരിവട്ടം പോലീസ് അറസ്റ്റു ചെയ്തു. കളമശേരി സ്വദേശി അര്‍ജുന്‍ (22), കറുകപ്പള്ളി സ്വദേശി ഉബൈസ് (29) എന്നിവരാണ് അറസ്റ്റിലായത്. ഇവര്‍ക്കെതിരെ വധശ്രമത്തിനു കേസെടുത്തു.
22ന് പുലര്‍ച്ചെ 12ന് കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിനു സമീപമായിരുന്നു സംഭവം. റീല്‍സ് ചിത്രീകരണം നടക്കുന്നതിനിടെ ഇവരുടെ പക്കലുണ്ടായിരുന്ന എയര്‍ഗണ്ണില്‍നിന്ന് അഭിഭാഷകനായ പറവൂര്‍ കടുങ്ങല്ലൂര്‍ സ്വദേശി അജ്മല്‍ അലി (29) യുടെ നെറ്റിയില്‍ വെടിയേല്‍ക്കുകയായിരുന്നു.
അജ്മല്‍ അലിയും സുഹൃത്തുക്കളും ഈസമയം സ്റ്റേഡിയത്തിനു സമീപത്തെ കടയില്‍ ഭക്ഷണം കഴിച്ചുകൊണ്ടിരിക്കുകയായിരുന്നു. അജ്മല്‍ അലിയെ ആശുപത്രിയില്‍ പ്രാഥമിക ശുശ്രൂഷ നൽകിയശേഷം വിട്ടയച്ചു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
