ബോളിവുഡ് താരദമ്പതികളായ ഐശ്വര്യ റായിയും അഭിഷേക് ബച്ചനും വേര്‍പിരിയുകയാണെന്ന തരത്തിലെ അഭ്യൂഹങ്ങള്‍ പ്രചരിക്കാന്‍ തുടങ്ങിയിട്ട് ഏറെ നാളായി. നടി നിമ്രിത് കൗറുമായി അഭിഷേക് പ്രണയത്തിലാണെന്നും ഇതാണ് ഐശ്വര്യയുമായുള്ള വിവാഹജീവിതത്തില്‍ വിള്ളല്‍ വീഴ്ത്തിയതെന്നും റിപ്പോര്‍ട്ടുകള്‍ പുറത്തുവന്നിരുന്നു. ഇപ്പോഴിതാ വാര്‍ത്തകളില്‍ പ്രതികരിച്ചിരിക്കുകയാണ് ബച്ചന്‍ കുടുംബവുമായി അടുത്ത ബന്ധമുള്ളയാൾ.
അഭ്യൂഹങ്ങളില്‍ സത്യത്തിന്‍റെ ഒരു കണിക പോലുമില്ല. അവര്‍ (നിമ്രിത് കൗർ)എന്തുകൊണ്ട് നിരാകരിക്കുന്നില്ല എന്നത് അദ്ഭുതപ്പെടുത്തുന്നു. ഇപ്പോള്‍തന്നെ ജീവിതത്തിലെ പല കാര്യങ്ങളിലൂടെയും കടന്നുപോവുന്നതിനാലാണ് അഭിഷേക് പ്രതികരിക്കാത്തത്. എല്ലാ വിവാദങ്ങളില്‍ നിന്നും വിട്ടുനില്‍ക്കാനാണ് അദ്ദേഹത്തോട് പറഞ്ഞിട്ടുള്ളത്.
എങ്ങനെയാണ് ഇത്തരം അഭ്യൂഹങ്ങള്‍ പരന്നത്? ഭാര്യയെ വഞ്ചിക്കുന്ന തരത്തിലുള്ള ആളല്ല അഭിഷേക്. ഭാര്യയോട് പൂര്‍ണമായും വിശ്വസ്തനാണ് അദ്ദേഹം. അഭ്യൂഹങ്ങളില്‍ കുടുംബം പ്രതികരിക്കാത്തത് അവസരമായി കാണരുത്. അഭ്യൂഹങ്ങളില്‍ വളരെ കോപാകുലരാണവർ. ആരാണിതിനു പിന്നിലെന്ന് കണ്ടെത്താനുള്ള ശ്രമത്തിലാണവർ. ശേഷം അവര്‍ക്കെതിരേ നിയമനടപടി സ്വീകരിക്കുകയും ചെയ്യും- അടുത്തവൃത്തം വ്യക്തമാക്കി.
ബച്ചന്‍ കുടുംബം ഐശ്വര്യയില്‍ നിന്ന് അകന്നുവെന്നും ഐശ്വര്യയും മകളും സ്വന്തം വീട്ടിലാണെന്നുമാണ് പുറത്തുവരുന്ന വാര്‍ത്തകൾ. അനന്ത് അംബാനിയുടെയും രാധിക മര്‍ച്ചന്‍റിന്‍റെയും വിവാഹത്തിന് ബച്ചന്‍ കുടുംബത്തിനൊപ്പം ഐശ്വര്യയും മകളും വരാത്തതാണ് അഭ്യൂഹങ്ങള്‍ക്ക് തുടക്കം കുറിച്ചത്.
ചടങ്ങിനിടെ ഐശ്വര്യയും മകളും ബച്ചന്‍ കുടുംബത്തില്‍ നിന്ന് അകലം പാലിച്ചിരുന്നതും വലിയ ചര്‍ച്ചയായിരുന്നു. ഇതിനിടെ മണിരത്‌നം സംവിധാനം ചെയ്യുന്ന ഹിന്ദി സിനിമയില്‍ അഭിഷേകും ഐശ്വര്യയും നായികാനായകന്മാരായി എത്തുന്നു എന്നും വാര്‍ത്തകളുണ്ട്.
