കോട്ടയം: കുറിച്ചിയിൽ സാമൂഹ്യവിരുദ്ധർ അയ്യൻകാളി സ്മാരകത്തിന്‍റെ ഗ്ലാസ് അടിച്ചുതകർത്തു. ഇന്നു പുലർച്ചെ മൂന്നു മണിയോടെയാണ് സംഭവം. സ്മാരകത്തിന് സമീപം രാത്രിയിൽ ചെറു സംഘങ്ങളായി പുതുവത്സരാഘോഷമുണ്ടായിരുന്നു. ആരാണ് അക്രമത്തിനു പിന്നലെന്ന് വ്യക്തമായിട്ടില്ല.
സമീപത്തെ ബാങ്ക്, കള്ളുഷാപ്പ് എന്നിവിടങ്ങളിലെ സിസിടിവി ദൃശ്യങ്ങൾ പോലീസ് പരിശോധിച്ചു വരുന്നു. കുറിച്ചി കേളൻ കവലയ്ക്കു സമീപം സ്ഥാപിച്ചിരുന്ന അയ്യൻകാളി സ്മാരകമാണ് തകർക്കപ്പെട്ടത്. പുലർച്ചെയാണ് സംഭവം നാട്ടുകാർ അറിയുന്നത്. സമീപത്തെ കള്ളുഷാപ്പിലെ സിസിടിവി ദൃശ്യങ്ങളിൽ മൂന്നു പേർ നടന്നു പോകുന്നത് കണ്ടെത്തി.
എന്നാൽ ആളെ തിരിച്ചറിയാൻ കഴിയുന്നില്ല. ഇവരാണോ സ്മാരകം തകർത്തതെന്ന് വ്യക്തമല്ല. ബാങ്കിലെ സിസിടിവി കൂടി പരിശോധിച്ചാൽ എന്തെങ്കിലും സൂചന ലഭിക്കുമെന്നാണ് പോലീസ് കരുതുന്നത്. ചിങ്ങവനം പോലീസ് സ്ഥലത്തെത്തിയിട്ടുണ്ട്.
