സോഷ്യല്‍മീഡിയയില്‍ താരങ്ങളുടെ വ്യാജമരണവാര്‍ത്തയും മറ്റ് തെറ്റായ വാര്‍ത്തകളും പ്രചരിക്കുന്നത് വ്യാപകമാകുകയാണ്. ജഗതി ശ്രീകുമാര്‍, സലിംകുമാര്‍ പോലുള്ളവരെ ഇതിനോടകം സോഷ്യല്‍മീഡിയ വഴി കൊന്നിട്ടുണ്ട്. ഇത്തരത്തില്‍ സോഷ്യല്‍മീഡിയയുടെ ഏറ്റവും പുതിയ ഇരയായിരിക്കുന്നത്, ബോളിവുഡ് നടന്‍ അജയ് ദേവ്ഗണ്‍ ആണ്.
ബോളിവുഡ് താരം അജയ് ദേവ്ഗണ്‍ ഹെലികോപ്റ്റര്‍ അപകടത്തില്‍ മരിച്ചതായാണ് ഇപ്പോള്‍ വാട്ട്സ്ആപ്പില്‍ നടക്കുന്ന വ്യാജ പ്രചരണം. മഹാരാഷ്ട്രയിലെ സതാര ജില്ലയിലുള്ള മഹാബലേശ്വറിലുണ്ടായ ഹെലികോപ്റ്റര്‍ അപകടത്തില്‍ അജയ് മരിച്ചതായാണ് പ്രചരിക്കുന്ന വാര്‍ത്തകള്‍. സിനിമയില്‍ നിന്നെടുത്ത അജയ് ദേവ്ഗണിന്റെ പരിക്കേറ്റ ചിത്രങ്ങള്‍ സഹിതമാണ് പ്രചാരണങ്ങള്‍ നടക്കുന്നത്.
എന്നാല്‍, ഇത്തരത്തിലൊരു ഹെലികോപ്റ്റര്‍ അപകടമേ നടന്നിട്ടില്ല എന്നതാണ് യാഥാര്‍ത്ഥ്യം. പോലീസും അജയ് ദേവ്ഗണിനോടടുത്ത വൃത്തങ്ങളും ഇക്കാര്യം സ്ഥിരീകരിക്കുന്നുമുണ്ട്. ഏതാണ്ട് ഒരാഴ്ച്ചയായി അജയ് ദേവ്ഗണിന്റെ മരണവാര്‍ത്ത സോഷ്യല്‍മീഡിയയില്‍ പ്രചരിക്കുന്നുണ്ട്. വ്യാജവാര്‍ത്തയുടെ ഉറവിടം എതാണെന്ന കാര്യം പോലീസ് അന്വേഷിക്കുന്നുണ്ട്. അകിവ് അലി സംവിധാനം ചെയ്യുന്ന ചിത്രത്തിന്റെ ഷൂട്ടിംഗുമായി ബന്ധപ്പെട്ട് അജയ് ദേവ്ഗണ്‍ ഇപ്പോള്‍ മുംബൈയില്‍ തന്നെയുണ്ടെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.
