പത്തനംതിട്ട: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച യുവാവ് അറസ്റ്റില്‍.റാന്നി പെരുനാട് മാമ്പാറ മുബാറക് മന്‍സിലില്‍ അജ്മലിനെ ( 21) യാണ് പോക്സോ കേസ് ചുമത്തി പോലീസ് അറസ്റ്റു ചെയ്തത്.
പത്തനംതിട്ട വനിതാ സ്റ്റേഷന്‍ എസ്എച്ച്ഒ എ. ആര്‍. ലീലാമ്മയയും സംഘവുമാണ് അജ്മലിനെ കസ്റ്റഡിയിലെടുത്തത്.
പെണ്‍കുട്ടിയുടെ വീടുമായി യുവാവിനുണ്ടായിരുന്ന സുഹൃദ് ബന്ധമാണ് പീഡനത്തിലേക്കു നയിച്ചതെന്നു പറയുന്നു.
പെണ്‍കുട്ടിയെ സ്‌കൂളിലെത്തിക്കാനും മറ്റും ഒപ്പംകൂടിയ ഇയാള്‍ കുട്ടിയുമായി ഏറെ സൗഹൃദത്തിലായി.
ഒരു വർഷത്തോളം പീഡനം!
ആര്‍ക്കും സംശയം തോന്നാത്ത വിധത്തില്‍ ഇടപെട്ട അജ്മല്‍ പിന്നീട് പെണ്‍കുട്ടിക്കു വിവാഹ വാഗ്ദാനം നല്‍കി പീഡിപ്പിച്ചുവെന്നാണ് പരാതി.
ഒരു വര്‍ഷത്തോളം ഇത്തരത്തില്‍ ഇയാള്‍ ഉപദ്രവിച്ചുവെന്നാണ് പെണ്‍കുട്ടിയുടെ പരാതിയില്‍ പറയുന്നത്. വീട്ടുകാര്‍ വിവരം അറിഞ്ഞതോടെ കുട്ടിയെ മറ്റൊരിടത്തേക്കു മാറ്റി. അജ്മലിനെ താക്കീത് ചെയ്തിരുന്നു.
എന്നാല്‍ ഫോണിലൂടെ ഇയാള്‍ ശല്യം തുടരുകയും കുട്ടിയുടെ സ്വകാര്യ ദൃശ്യങ്ങള്‍ നവമാധ്യമങ്ങളിലൂടെ പ്രചരിപ്പിക്കുമെന്ന ഭീഷണിയും മുഴക്കിയതിനേ തുടര്‍ന്നാണ് ജില്ലാ പോലീസ് മേധാവിക്കു പരാതി നല്‍കിയത്.
ഡിവൈഎഫ്ഐ പ്രാദേശിക നേതാവു കൂടിയാണ് അറസ്റ്റിലായ അജ്മല്‍.
