മമ്മൂട്ടിയും ഐശ്വര്യ റായ് ബച്ചനും ഒന്നിച്ചെത്തിയ ‘കണ്ടു കൊണ്ടേൻ കണ്ടു കൊണ്ടേൻ’ എന്ന സിനിമയിലെ ക്ലൈമാക്സ് രംഗം അജു വർഗീസ് അവതരിപ്പിച്ചതാണ് ഇപ്പോൾ സോഷ്യൽ മീഡിയയിൽ ട്രെന്‍റിംഗ്. അഭിനയജീവിതത്തിൽ 14 വർഷം പൂർത്തിയാക്കുന്ന അജുവിന് ആശംസകൾ അറിയിച്ചുകൊണ്ട് അരുണ്‍ ചന്തു പങ്കുവച്ച വിഡിയോ ആണിത്.
വീഡിയോ വൈറലായതോടെ നിരവധി ആളുകളാണ് താരത്തെ ട്രോളാൻ വേണ്ടി വന്നത്. സിനിമാ താരങ്ങൾ ഉൾപ്പെടെയുള്ളവർ അജുവിനെ എയറിലാക്കിയെന്ന് പറയാം. മമ്മൂട്ടിയുടെ അഭിനയമികവ് അതേപടി അനുകരിക്കാന്‍ ശ്രമിക്കുകയാണ് അജു. ഫോൺ നോക്കിയാണ് അജു അഭിനയിക്കുന്നത്. അനുകരണത്തിന്‍റെ കഷ്ടപ്പാട് കണ്ട് പ്രേക്ഷകരൊന്നടങ്കം പൊട്ടിച്ചിരിക്കുകയാണിപ്പോൾ.
‘നമ്മൾ ചെയ്യുമ്പോ മാത്രം എന്താഡാ ശരി ആവാത്തെ?’14 വര്‍ഷങ്ങള്‍! എന്ന കുറിപ്പോടെയാണ് അരുൺ ചന്തു വീഡിയോ പങ്കുവച്ചത്. ‘ഞങ്ങളുടെ ചില പാതിരാ പരിശീലനരംഗങ്ങളിൽ നിന്നുള്ളതാണിത്. മമ്മൂക്കയുടെ ആവർത്തിക്കപ്പെടുന്ന അനശ്വര അഭിനയ മുഹൂർത്തങ്ങൾ നോക്കി അദ്ദേഹത്തിന്‍റെ മികവിന്റെ ഒരു ശതമാനമെങ്കിലും പിടിച്ചെടുക്കാൻ കഠിനമായി ശ്രമിക്കുകയാണ്. ഓരോ തവണയും വന്‍ പരാജയത്തിലാണ് അത് അവസാനിക്കാറ്. പക്ഷേ, അങ്ങനെയൊരു പരിശ്രമം നടത്തുന്നതിനെയാണല്ലോ വിലമതിക്കേണ്ടത്. പരിശ്രമത്തിനിടയിലെ സന്തോഷവും പൊട്ടിച്ചിരികളും! ഇതാണ് അജു വർഗീസിന്‍റെ 14 വർഷങ്ങൾ! എന്നായിരുന്നു അരുണിന്‍റെ കുറിപ്പ്.
